سعودی ولی عہد نا اردن نا فرمانروا تون ٹیل فون آ گپ وتران، غزہ ٹی مروک آ پیش رفت آ گپ وتران

ریاض۔ 05 اپریل (اے پی پی) سعودی عرب نا ولی عہد شہزادہ محمد بن سلمان و اردن نا فرمانروا شاہ عبداللہ ثانی ٹیل فون آ رابطہ کرینے۔ اردو نیوز نا رداٹ ہڑتوم آ راہشونک ایلم ملک و الس نا نیام اٹ سوگو تاریخی تعلقداری، دے ٹک نیامی و خاص وڑاٹ غزہ ٹی مروک آ پیش رفت آ گپ وتران کریر۔ سعودی ولی عہد و اردنی فرمانروا اِرا ریاستی ایسری نا بنداوآ فلسطین نا ویل انا سیاسی ایسر اس پٹنگ نا گرج آ زور شاغا ہرا4 جون 1967 نا سیم تتون اسہ آجو و وتواجہ فلسطینی ریاست اسے نا جوڑ کننگ نا ضمانت ایتک ہرانا دارالحکومت  بیت المقدس مرے۔ اردن نا فرمانروا ہڑتوم آملک آتا تعلقداری نا کیول آ گمر نا درشانی و اوفتے غٹ بشخ آتیٹی سوگو کننگ نا است خواہی ظاہرکرے۔ سعودی ولی عہد اردن نا سلامتی و سوگوی نا بابت اردنی حکومت نا کنڈآن چست کروک گام گیج آتیکن مملکت نا مخ تفی نا درشانی ءِ کرساپارےکہ سعودی عرب داحالیت آتیٹی برادر ملک اردن تون سلوک ءِ۔