بیجنگ۔ 27 مارچ (اے پی پی) چین خیبرپختونخوا ٹی داسو ہائیڈرو پاور پروجیکٹ نا قافلہ غا دہشت گرد جلہو نا مذمت ءِ کرسا داواقعہ نازوت پورو جاست وپاست نا خواست کرینےو پارینے کہ چین پاکستان کمکاری ءِ نسخان تننگ نا اسہ کوشست اس ہم سرسہب مفک۔ چائنا گلوبل ٹیلی ویژن نیٹ ورک نا رداٹ چین نا وزارت خارجہ نا ترجمان پاکستان اٹ داسو ہائیڈرو پاور پروجیکٹ نا قافلہ غا دہشت گرد جلہو آ چارشنبے نادے آ تران کرسا پارے کہ چین دا دہشت گرد جلہو نا ترندی اٹ مذمت ءِ کیک و پاکستان آن داواقعہ نا زوت آن زوت پورو جاست وپاست نا خواست کیک۔ ترجمان پارے کہ 26 مارچ آ صوبہ خیبرپختونخوا ٹی چینی کمپنی نا داسو ہائیڈرو پاور پروجیکٹ نا قافلہ غا دہشت گرد جلہو اٹی 5 چینی و اسہ پاکستانی شاری اس زوال کرے۔ اوپدسلوک خاہوت آتون ہمدردی نا درشانی ءِ کرے۔ اوپارے کہ چین پاکستان آن خواست کیک کہ او دا واقعہ نا زوت پورو جاست وپاست ءِ کے، قصور وار آتے اوفتے اوفتا کروک نا سزا تننگے۔ ترجمان پارے کہ نن پاکستان ءِ پانہ کہ او پاکستان اٹ چینی شاری، ڈٹ و ادارہ غاتا رکھ ءِ پک کننگ کن گچین گام گیج کے۔ چین پاکستان تون ہرممکن کوشست اتون فالواپ آپریشن آ کاریم کننگ اٹی ءِ۔
