اقوام متحدہ ۔ 26 مارچ (اے پی پی) پاکستان غزہ ٹی جنگ بندی نا خواست آ تالان اقوام متحدہ نا سلامتی کونسل نا قرارداد نا ستاءِ کرسا داہیت آ زور شاغانے کہ بھلو انتظار اسے آن پد منظور مروک آقرارداد آ عملدرآمد بایدے مرے۔ اقوام متحدہ ٹی پاکستان نا آخبتی مندوب منیر اکرم تدوک آدے سلامتی کونسل نا قرارداد نا منظوری نا بابت اے پی پی ءِ پارے کہ نن اقوام متحدہ نا چارٹرنا آرٹیکل 25 نارداٹ سلامتی کونسل نا دا قرارداد آ دمدستی وڑاٹ عملدرآمد نا خواست ءِ کینہ۔ دا چارٹر نا آرٹیکل نا شڑت آتا رداٹ ، اقوام متحدہ نا باسک ملک 15 باسکی کونسل نا فیصلہ غاتیا عملدرآمد کننگ آ امنا ءُ۔ پاکستانی مندوب پارے کہ غزہ ٹی اسرائیل نا وحشیانہ مہم ءِ توننگ کن دا بایدے اولیکو گام مرے۔ پاکستان جون 1967 آن مست انا سیم تیا تالان اسہ رکھ، قابل عمل و وتواجہ فلسطینی ریاست اسے نا جوڑ مننگ نا کمک اٹ اسہ انصاف اٹ ، جوان وپائیدار ایسری کن فعال وڑاٹ کاریم کرسا کیک، ہرانا دارالحکومت القدس شریف مرے۔ دوشنبے نادے آ سلامتی کونسل نا قرارداد اٹی روچہ مبارک اٹی دمدستی جنگ بندی و غزہ ٹی امدا د نا فراوانی ءِ ودفنگ نا دمدستی گرج انا خواست ءِ کننگا۔ قرارداد نا مخ تفی ٹی 14 وونٹ تما وخت اس کہ امریکہ ووٹنگ اٹی بشخ ہلتو۔
