بیجنگ۔ 29 دسمبر (اے پی پی) چین اٹی پاکستانی سفارت خانہ نا سائنس اینڈ ٹیکنالوجی کونسلر خان محمد وزیر نا کماشی ٹی اسہ ڈل اس چین نا شار وینزو ٹی پیپلزالیکٹرک اپلائنسز گروپ نا دورہ ءِ کرے و الیکٹرک اپلائنسز اٹ کمکاری نا بابت اسہ جوان ءُ گپ وتران اس کرے۔ الیکٹرک اپلائنسز گروپ نا امپورٹ اینڈ ایکسپورٹ کمپنی نا وائس جنرل منیجر وویی لین ڈل ءِ انوویشن ایکسپیریئنس سینٹر و سمارٹ فیکٹری نا سرجمی اٹ دورہ ءِ کرفے۔ اوڈل ءِ پیپل الیکٹرک اپلائنسز نا پروڈکٹ لائن، پروڈکشن نا عمل، و تکنیکی لائخی تا بارواٹی اسہ جوا ن ءُ حوال اس تس۔ داوخت آ خان محمد وزیر پیپلزالیکٹرک اپلائنسز گروپ ناشاندار سرسہبی ، پوسکنی و آب انا بھاز ستاءِ کرے۔ وزیر چینی گروپ ءِ پاکستان نا الیکٹرک ازباب آتا مارکیٹ نا بارواٹی معلومدار کرے، و صنعتی بشخ اٹی گروپ اتون تبادلہ و کمکاری ءِ مون آ دننگ اٹ پبی است خواہی نا درشانی ءِ کرے۔ داکساس ءِ خلنگانے کہ پاکستان 2023آن 2047اسکان بجلی کھپت اٹی 5 درسد شرح نمو ءِ برقرار تخک۔ مانگ اٹی دا ودکی مارکیٹ اٹی برقی ازباب آتا گرج ءِ ہم ودفک۔ داوخت آ وویی لین پارے کہ نن پاکستانی کاروباری ادارہ غاتون اواری اٹ جہانی منڈی تے پٹنگ کن کمک کننگ نا بھلو لائخی اس خننہ، پوسکن آ ٹیکنالوجی و پوسکن آ مصنوعات آتا گیشتر رینج اتون، نن تین پہ تینی شونداری ءِ مون آ دننگ کن تینا آزموندہ و وسیلہ غاتیان فائدہ ہرفنگ کن بے چین ءِ۔
