ماسکو۔ 28 دسمبر (اے پی پی) روس انا وزیرخارجہ سرگئی لاوروف غزہ ٹی دمدستی جنگ بندی نا خواست کرساپارینے کہ غزہ و مچ آ دے ٹکی نیامی ٹی سوگوی دوئی کننگ نا ہندا اسٹ انگا کسر ءِ۔تاس ءِ انٹرویو ٹی او پارے کہ دا جھیڑہ 75 سال آن برجاءِ و دانا چٹنگ نا ہچ ءُ وڑاس نظر بفننگ ءِ۔ اسرائیل و فلسطینی عسکریت پسند ٹولی تا نیام اٹ جھیڑہ، جلہو و ورندی کارروائی تا چکر اٹی غزہ نا آبادی ءِ وار وار آ نسخان ہرفوئی تمانے۔ داناانصافی ءِ چٹفنگ نا گرج ءِ ہرادے فلسطینی تا چندی چینک سگنگ ءُ۔ اوپارےکہ دہشت گردانہ جلہو، اوفتا است بڈی یا جہانی انسانی کانود نا پاش آن پاش خلاف ورزی ءِ کرسا اجتماعی سزا نا وڑوڈول آتے اٹ ورندی تننگ ءِ منپنہ۔ اودے ٹک نیامی نا ساڑی حالیت آتے امریکی خارجہ پالیسی نا بے سہبی نا نتیجہ گوندا و اسرائیل و فلسطین نا نیام اٹ ثالثی نا کوشست آتے سوگوی تننگ نا خواست کرے۔ اودابابت روس انا موقف نا وضاحت ءِ کرسا اقوام متحدہ نا سلامتی کونسل و جنرل اسمبلی نا فیصلہ غاتون اوار اوار عرب امن گام انا حوالہ ءِ تس۔ اوپارے کہ جہانی ثالث آتا زمواری فریق آتے ہمووڑنا مذاکرات نا بناءِ کننگ اٹ کمک کننگ ءِ ہرانا تہہ ٹی او غٹ جھیڑہ غاتا ویل آتے ایسر کننگ کیر۔ روسی وزیرخارجہ اعتراف کرے کہ دُن تو دا آسان اف ولے مذاکرات مفننگ نا دروشم اٹ خونریزی برجاسلک۔
