اسلام آباد۔ 27مئی (اے پی پی) وزیر داخلہ چوہدری نثارعلی خان جعلی شناختی کارڈ و پاسپورٹ تخوک آشاری تے جعلی شناختی کارڈ و پاسپورٹ آتے 2تو انا تہہ ٹی تینٹ جمع کرفنگ نا مہلت ترسا پارینے کہ دا مہلت آن استفادہ کروک آتا برخلاف ہچ ئُ کارروائی اس کننگپک وخت اس کہ مہلت آن فائدہ ہرفسا تینا جعلی کارڈ و پاسپورٹ آتے سرینڈر کپروک آتا برخلاف کانود نا رداٹ سخت کارروائی کننگک، بروک آ شش تُو اٹی غٹ شناختی کارڈ آتا دُوارہ تصدیق مریک۔ جعلسازی ٹی اوار نادرا و پاسپورٹ کارندہ غاک اگہ تینٹ جعلسازی تا پیدواری ئِ کیرہ تو اوفتے ہم رعایت تننگک ایلو دروشم اٹ نوکری تیان کشنگ آن بیدس اوفتا برخلاف فوجداری مقدمہ غاتے قائم کننگک۔ پاکستانی جعلی شناختی دستاویزات تخوک آ درملکی تا پیدواری کن ریوارڈ اسکیم نا پڑوئِ کننگک، شناختی کارڈ نا تصدیق کن نادرا ٹی رجسٹرڈ دونیم کروڑ خاہوت آتا سرکڑدہ غاتے اوفتا خاہوت ٹری آ گدریفنگک تانکہ او جعلسازی نا دروشم اٹی پیدواری ئِ کننگ کیر، جعلی شناختی دستاویزات آتا چٹفنگ پاکستان نا سلامتی نا معاملہ ئِ ہراڑآ ہچ ئُ سمجھوتہ اس کننگ مفک۔ جمعہ آ نادرا ہیڈکوارٹرز اٹی بڑزکو کہولی دیوان آن گڈ پریس کانفرنس آن تران کرسا وزیر داخلہ چوہدری نثارعلی خان پارے کہ نادرا و ڈائریکٹوریٹ جنرل آف پاسپورٹس اینڈ امیگریشن ئِ 48گھنٹہ نا وخت تس تانکہ او جعلی شناختی دستاویزات آتا چٹفنگ نا بابت روڈ میپ اس تیار کننگ کے، اینو نا دیوان ہنداچرجوئی نا اسہ کڑی اس ئسک۔ اوپارے کہ باعزت، باوقار، جمہوری و باغیرت ملک اسے کن ناقابل سگ ئِ کہ اونا شہریت ئِ سودا کننگے۔ اوپارے کہ ہرادا گھناﺅنہ کاروبار اٹی اوڑدہ ئِ اوفتے سگنگ پننگک، دا پاکستان نا سلامتی نا معاملہ ئِ ہراڑآ ہچ ئُ سمجھوتہ اس کننگ مفک۔ اوپارے کہ بلوچستان اٹی امریکی جلہو نا واقعہ غان بھاز مستین آن نن شناختی دستاویزات آتیٹی جعلسازی نا برخلاف گام گیج کننگ اُن۔ اودابابت حساب وکتاب ئِ پیش کرسا پارے کہ 2006ءٹی صرف 25پاسپورٹس بلیک لسٹ کننگار، 2007ءٹی 37، 2008ءٹی 12، 2009ءٹی 25و بروک آ مسہ سال آتیٹی 361شناختی کارڈ بلک کننگار وخت اس کہ کنا وزارت ئِ سنبھالنگ آن گڈ آن 29ہزار پاسپورٹس آتے بلیک لسٹ کننگا ہرا جعلسازی کرسا دوئی کننگاسر۔ اوپارے کہ جعلسازی ٹی اوار نادرا ملازم آتا برخلاف 2001ء، 2002ءو 2003ءٹی ہچ ئُ کارروائی اس کننگ تو و اسٹ اسے ہم سزا ملیتو، انت مگے دا دوراٹی غٹ گڑاک سہی مسورہ و غٹ فرشتہ ئسر۔ اوپارے کہ 2004ءٹی صرف 8ملازم آتا برخلاف کارروائی مس، ہنداوڑ ہرسال محض اسٹ ارٹ کیس اٹی ہی اسہ ملازم اسینا برخلاف کارروائی اس کننگا وخت اس کہ 2013ءآن داوخت اسکان ننا دور اٹی 826ملازم آتا برخلاف جعلسازی کننگ آ سخت کارروائی کننگا و اسہ لکھ 12ہزار کارڈز صرف تدوک آ منہ تو انا وخت بلاک کننگار، اوکان مست مسکوہی سال ہم 96ہزار کارڈز بلاک کننگاسر۔ او پارے کہ ننے ہڑدڑی حالیت آتا مون ئِ، مہالو جعلسازی آ ہچ ئُ کارروائی اس متوکہ وخت اس کہ داسا لکھ آتا حساب اٹ شناختی کارڈز و ہزار آتا حساب پاسپورٹس آتے بلاک کننگانے ولے کنکن دا حالیت است جمی اف، داسکان نا درکار شفافیت ئِ مون آ اتنگ کتنون۔ اوپارے کہ ولی محمد ئِ 2001 ءٹی ہی شناختی کارڈ تننگا ہرا 2002 ءٹی کمپیوٹرائزڈ کرفنگا، اودے اولیکو پاسپورٹ 2005ءٹی تننگا ہرانا 2011ءٹی تجدید کرفنگا و داسا دُوارہ تجدید 2016ءٹی مروئی ئسک ۔ اوپارے کہ بے شک داغٹ مسکوہی دور و حکومت آتیٹی مس ولے پاسپورٹ و نادرا نا دفترآک تو ہنداڑے ئسر ۔ اوپارے کہ ہڑدڑی بنداو تیا دا چرجوئی ٹی گام گیج کننگانے و فیصلہ کننگانے کہ بروک آ شش تواٹی غٹ شناختی کارڈز آتا دُوارہ تصدیق مریک۔ اوپارے کہ کنے پاننگانے کہ اوٹی بھاز پیسہ و وخت خڑچ مریک ولے ای صفا کرینٹ کہ نادرا تون اگہ تینا پنداوڑی کن و ہار ٹیکی اٹ تننگ و داڑے اوڑے پیسہ خڑچ کننگ کن فنڈز ارے تو پاکستان نا سیکورٹی کن فنڈز اکن انت اکن اف، دا پاکستان نا سیکورٹی نا معاملہ ئِ ہراڑآ ہچ ئُ سمجھوتہ اس کننگپک۔ اوپارے کہ داکان مست موبائل فون سم آتا تصدیق نا ویل آ ہم پاننگاسس کہ دابھاز مشکلئُ کاریم اسے و شاید دا مننگ کپک، ولے ای صفاکریٹ کہ داکاریم مریک کاہک۔ موبائل فون کمپنی تا مالک آک ملک آن زرآتے پیشن دننگ نا ہم دھڑکو ہم تسر ، نن اسہ زور اسے ہم اوتون و صفا کرین کہ پاکستان نا سلامتی غٹ آن مقدم ئِ و موبائل فون کمپنی تا چیف ایگزیکٹوز آتے ہن پارین کہ اگہ سم اس دہشت گردی ٹی کاریم اٹ بس تو کمپنی نا چیف نا برخلاف مقدمہ درج مریک اوکان گڈ 10ئُ نیم کروڑ سم آتا تصدیق نا عمل پورو کننگا و داہمو کاریم ئس ہرا کیہی سال آتیان متوکہ ۔ وزیر داخلہ پارے کہ شناختی کارڈ آتا تصدیق کن اسہ نظام اس وضع کننگک و دونیم کروڑ رجسٹرڈ خاہوت آتا تصدیق اسہ وڑوڈول اسینا تحت کننگک ہراڑکن اسہ ڈائریکٹوریٹ اس جوڑ کننگانے۔ اوپارے کہ نادراٹی 26ڈی جیز کاریم کریرہ ہرافتے آن 16ئِ ای اسہ پلو کننگ نا حکم تسٹ و داسا 10 ڈی جیز کاریم کیرہ ۔ اوپارے کہ نادرا اشتہارات آتا ذریعہ جعلی شناختی کارڈ جوڑ کروک آتے کن 2تو انا مہلت نا پڑوئِ کیک، داوخت اٹی او تینٹ تینا جعلی شناختی کارڈ آتے نادراٹی جمع کرفیر۔ اوکان بیدس نادرا و پاسپورٹس ڈائریکٹوریٹ نا ہرا کارندہ غاک جعلی شناختی دستاویزات نا چرجوئی ٹی کمکاری کرینو اوفتے ہلنگ اٹی ہم کمک کیر تو دننگا شاری تا برخلاف ہچ ئُ کارروائی اس مفک ۔ وزیر داخلہ پارے کہ درملکی تا شناختی دستاویزات آتے بلاک کننگ نا آڑ اٹی اسہ پاکستانی شاری اسیتون بیدادی مننگ کن الیپرہ،بلاک کروک آ اسہ لکھ 12ہزار شناختی کارڈ آتا فیصلہئِ ہم زوت کننگ کن گام گیج کننگک تانکہ حقدار خلقت آتے اوفتا حق رسینگ کے۔ وزیر داخلہ پارے کہ شناختی دستاویزات آتا تصدیق نا مشق بے کچ شفاف مریک و شیف آن بڑزاسکان اونا چاروکی ئِ کننگک ، دا ملک انا عزت و توقیر نا معاملہ ئِ، داچرجوئی ٹی میڈیا، سول سوسائٹی و الس نا کمک درکار ئِ۔ اسہ پین سوج اسینا ورندی ٹی اوپارے کہ اوغان مہاجر آتے دِکہ ترسا کشوک آ ہیت حکومت پاکستان نا پالیسی ئفک۔ دا درست ئِ کہ سالہا سال آن جتا سیمی ہند آتیان خلقت آتا ہن و بر مننگ ئِ، بارڈر مینجمنٹ سسٹم ئِ گچین جوڑ کننگ نا گرج ئِ و دا چرجوئی ٹی کاریم مننگ ئِ ۔ اوپارے کہ داوخت اسکان اخس کہ جعلی کارڈ مون آ بسنو دا مسکوہی حکومت آتا دو رانا برجاکروک اونو۔ اوپارے کہ تفتان والا واقعہ ویک اپ کال اسے۔
