اقوام متحدہ ۔ 05 دسمبر (اے پی پی) اقوام متحدہ نا جنرل اسمبلی سلہہ غاتا چٹفنگ و علاقائی و جہانی کہول آ امن و سلامتی ءِ مون آ دننگ کن پاکستان نا کنڈآن پیش کروک 4 قرارداد آتا منظوری ءِ تس۔ داقراردادآک ہندا بڑزکو مسخت آتا دوئی کننگ کن پاکستان ناپیدوار عزم انا ڈیک ءِ ایترہ۔ داقرارداد آتا مسودہ غاتا 193 باسکی جنرل اسمبلی نا فرسٹ کمیٹی (سلہہ غاتا چٹفنگ و جہانی سلامتی) نا کنڈآن بھلو گیشتری اسے تون منظور ی ءِ تننگا۔ دافتیان مسہ قرارداد علاقائی سلہہ غاتا چٹفنگ ، علاقائی و ذیلی علاقائی کہول آتیا روایتی سلہہ غاتا کنٹرول اتون اوار اوار علاقائی و ذیلی علاقائی رداٹ پت سازی نا گام گیج آتا بابت ءُ۔ چارمیکو قرارداد اٹی جوہری سلہہ تخپروک ریاست آتیکن جہانی سلامتی نا یقین دہانی نا خواست کننگانے۔ علاقائی و ذیلی علاقائی رداٹ ‘‘ علاقائی سلہہ غاتا چٹفنگ و پت سازی نا گام گیج’’ نا سرحال آن قراردادآتا جنرل اسمبلی آن بیدس ووٹنگ نا امنائی منظوری ءِ تس وخت اس کہ ‘‘ علاقائی و ذیلی علاقائی کہول آتیا روایتی سلہہ غاتا کنٹرول ’’نا بابت قرارداد انا مخ تفی ٹی 186 باسک ملک آک وونٹ تسر وخت اس کہ بیرہ اسہ ملک بھارت قرارداد نا مخ تفی آن انکار کرے۔ جوہری سلہہ غاتا کاریم اٹ اتنگ یا کاریم اٹ اتنگ نا خطرہ نا برخلاف جوہری سلہہ تخپروک آ ریاست آتا رکھ ءِ پک کننگ کن گچین جہانی بست وبند آتا نتیجہ نا سرحال آن قرارداد آتے ہم بھلو گیشتری اسے اٹ منظور کننگا۔ داقرارداد نا حق اٹی 123باسک ملک وونٹ تسر۔ وخت ا س کہ 62 ملک رائے شماری ٹی بشخ ہلتور۔ جنرل اسمبلی تینا شڑت آتارداٹ جوہری سلہہ غاتا کاریم اٹ اتنگ یا کاریم اٹ اتنگ نا خطرہ نا برخلاف غیرجوہری سلہہ تخوک آ ریاست آتے جوہری سلہہ غاتا کاریم اٹ اتنگ یا کاریم اٹ اتنگ نا دھڑکونا برخلاف رکھ انا یقین دہانی کن گچین بست وبند آتیا زوت معاہدہ اسکان سرمننگ نا دمدستی گرج ءِ پک کرے۔
