اقوام متحدہ۔ 05 دسمبر (اے پی پی) اقوام متحدہ نا ادارہ اوسی ایچ اے سویلی غزہ ٹی اسرائیلی بمباری ٹی بھلو کچ اسے آ جونی و مالی نسخان ءِ پک کرینے۔ اوسی ایچ اے نا کنڈآن جاری حوال اٹی پاننگانے کہ سویلی غزہ ٹی ایسری ہفتہ ٹی اسرائیلی بمباری آن سد آ شہیدی ہموڑے پناہ ہلوک آ فلسطینی تیکن گڑتی ٹی ودکی کرینے۔ کمکی ٹیم تا ہن وبر بھاز کچ اٹ و قطب اسکان رسینگ داسہ پورو وڑاٹ مسدود ءِ۔ حوال اٹی پاننگانے کہ ہفتہ نا پیشیم آن یک شنبے نا دیگر اسکان غزہ غا اسرائیلی بمباری آن کم از کم 316 بندغ شہید و 664 ٹھپی مسنو۔ فلسطینی پناہ گزین تا بابت اقوام متحدہ نا ادارہ یواین ڈبلیو آراے نا پاننگ ءِ کہ سویلی علاقہ رفح آ اسرائیلی فضائی جلہو آتا کمک اٹ مخلوق ءِ ہمپنگ آ بیوس کننگ انگ ءِ۔ یواین ڈبلیو آراے نا امور نا ڈائریکٹر تھامس وائٹ پارے کہ مخلوق ننے آن رکھ ہند آتا خواست ءِ کیرہ ولے ننتون اوفتے پاننگ کن ہچ اس اف۔
