اسلام آباد۔22نومبر (اے پی پی): ادارکی مزن وزیر انوارالحق کاکڑ ءَ گوشتگ کہ موسمی مٹ ءُ بدلی پاکستان وڑیں ملک آنی واستہ راجی سلامتی ءِ جیڈھ انت، پاکستان ءِ میاں اوستمانی تک ءَ موسمی مٹ ءُ بدلی ءَ را ودینگ ءَ بھر ءِ تہ ءَ ، یک درسد ءَ چہ کم بوھگ ءَابید پاکستان موسمی مٹ ءُبدلی آنی رد ءَ گشاں چہ گیش آماچیں ملک آنی لڑ ءَ ھوار انت۔ چار شمبے ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ: رد ءَ ادارکی مزن وزیر انوار الحق کاکڑ ءِ سروکی ءَ 28 بیست ءُ ھشتمی یونائیٹڈ نیشن کانفرنس آف پارٹیز کوپ-28 ءِ ھوالگ ءَ وزارت آنی وت مہ وتی یکجائی دیوان ءِ برجم دارگ بوت۔ دیوان ءَ ادارکی بنجاھی وزیر برائے ھزانگ ، درئی کار، ھاٹیگ ، موسمی مٹ ءُ بدلی، منصوبگ بندی ءُ سیادی داروکیں سرکاری اپسرگ آں بھر زوری کت۔ دیوان ءِ شریکیں مردم آں گوں تران کنان ءَ مزن وزیر ءَ گوشت کہ ماحولیاتی مٹ ءُبدلی پاکستان وڑیں ملک آنی واستہ راجی سلامتی ءِ جیڈھ انت، پاکستان ءِ میاں اوستمانی تک ءَ موسمی مٹ ءُبدلی آنی ودینگ ءِ بھر آنی تہ ءَ یک درسد ءَ چہ کم بوھگ ءَ ابید پاکستان موسمی مٹ ءُ بدلی ءَ چہ درستاں چہ گیش آماچیں ملک آنی تہ ءَ ھوار انت۔ ادارکی مزنک وزیر دبئی ، متحدہ عرب امارات ءَ بوھوکیں 28 بیست ءُ ھشتمی کانفرنس آف پارٹیز ءَ یکم ءُ 2 دسمبر ءَ مزن تکی دیوان ءَ پاکستان ءِ نماھندگی ءَ کنت۔
