بیجنگ۔ 17 نومبر (اے پی پی) چین نا صدر شی جن پنگ پارینے کہ ساڑی آ جہانی ویل آتا اسٹ انگا ایسر پائیدار شونداری ءِ۔ چینی خبررساں ادارہ نا رداٹ ایشیاپیسفک اکنامک کوآپریشن (اے پی ای سی ) نا اقتصادی راہشون آتون اوڑدہی ٹی اوپارے کہ ساڑی حالیت آتیٹی ننے پین امنائی سلاہ ودی کننگ و جہانی پائیدار شونداری نا مسخت اٹ زیات آن زیات محرک ودی کننگ کن گام گیج آتیا چکار کننگ نا گرج ءِ۔ اوپارےکہ غٹ ملک آک پائیدار شونداری کن اسہ سیاسی امنائی سلاہ اس ودی کیر و غٹ ملک آک کمکاری کن اواری اٹ کاریم کیر۔ اومستی پارے کہ اگہ نن ساڑی ویل آتیا زور مننگ خوانہ تو ننے پائیدار شونداری نا کنڈآ سفر طے کروئی مریک۔ اومستی پارے کہ چین گلوبل ڈویلپمنٹ انیشی ایٹیو(جی ڈی آئی ) ءِ مون آ ودفینے و جہانی برادری نا نیام اٹ ہم گرنچی ءِ مون آ دننگ و شونداری نسخان ءِ مر کننگ کن مثبت کوشست کرینے۔ اوسلاہ پیش کرے کہ غٹ ملک آتے چاگڑد دوست شونداری کن بدلی نا پوسکن آ کسر ءِ اختیار کروئی مریک وغٹ ملک آک اسیجائی وڑاٹ توانائی ، صنعتی و نقل و حمل نا پنجر نا بدلی و اپ گریڈنگ ءِ بایدے مون آ دننگے۔ کاربن گیس انا پیش تمنگ اٹ کمتی، کچٹی ٹی کمتی کروک آ گام گیج آتے مون آ دننگے۔ اوپارے کہ زرگزران و چاگڑد نا مربوط شونداری کن بڑزکو آب انا روزگار نا انصاف اٹ بدلی ءِ بایدے مو ن آ دننگے۔ اوپارے کہ غٹ ملک آک موسمیاتی بدلی تون مون تننگ کن جہانی ہم گرنچی ودی کیر۔ او غٹ ملک آتیا زور شاغا کہ او موسمیاتی بدلی نا بابت اقوام متحدہ نا فریم ورک کنونشن ءِ جہانی موسمیاتی نظم و نسق اٹی اسہ اہم ءُ چینل اسے نا وڑاٹ برقرارتخر۔ اسیجائی ولے جتا زمواری تا اصول آتیا عمل کیر۔ موسمیاتی ہدف آتے ترتیب ایتر۔ اوپارے کہ چین شونداری نا پوسکن آ تصور ءِ پورو وڑاٹ نافذ کرینے، زرگزران و راج انا جوان سوز و کم کاربن نا بدلی ءِ مون آ درینے و انسانیت و فطرت نا نیام اٹ ہم گرنچ بقائے باہمی نا وطن نا تفنگ اٹ پدریسہ کمک کرینے۔ گرین بیلٹ اینڈ روڈ انیشی ایٹیو ءِ مون آ دننگ کن چین گرین انفراسٹرکچر، گرین انرجی، گرین ٹرانسپورٹیشن و ایلو بشخ آتیٹی کمکاری ءِ پین سوگو کیک۔
