واشنگٹن۔ 16 نومبر (اے پی پی) امریکہ ٹی پاکستان نا سفیر مسعود خان امریکی تعلیمی ادارہ غاتیٹی تعلیم دوئی کروک آپاکستانی طالب علم آتا کچ اٹی ودکی ءِ ستاکڑزوک گوندسا اومیت ظاہر کرینے کہ ہڑتوم آملک آتا نیام اٹ کمکاری ءِ ودفنگ کن برجا کوشست آتا رداٹ ساڑی کچ ءِ بروک آ 3 سال اٹی دوگنا کننگک۔ پاکستانی سفارت خانہ غان جاری بیان نا رداٹ مسعود خان پارے کہ چندی امریکی تعلیمی ادارہ غاتیٹی پاکستانی طالب علم آتا ودوک آ کچ نئے بیرہ تعلیمی بشخ اٹی خڑکی کمکاری نا ڈیک ءِ ایتک بلکن آخبت اٹ سوگو ہڑتوم آکنڈآتا تعلقداری تا ضمانت ہم ارے۔ اوپارے کہ پاکستانی طالب علم آتے سائنس ، ٹیکنالوجی ، انجینئرنگ و ریاضی( ایس ٹی ای ایم) نا سرحال آتیٹی زیات آن زیات وارخواہی فراوان کننگ آ چکار کننگانے تانکہ او دا سرحال آتیٹی امریکی مہارت و علم آن فائدہ ہرفنگ کیر۔ امریکی محکمہ خارجہ و انسٹی ٹیوٹ آف انٹرنیشنل ایجوکیشن (آئی آئی ای) نا کنڈآن امریکہ ٹی خوانوک آ جہانی طالب علم آتا حساب وکتاب نا بابت سالانہ ’’اوپن ڈورزرپورٹ ‘‘ جاری کننگانے۔ رپورٹ نا رداٹ امریکہ ٹی خوانوک پاکستانی طالب علم آتا کچ 2022-23ٹی 16 درسد ودسا 10 ہزار 164 اسکان سرمس، دا تدوک آ سال 8 ہزار 772 ئس۔
