کوئٹہ۔ 27مئی (اے پی پی) انسپکٹر جنرل فرنٹیئر کور بلوچستان میجر جنرل شیرافگن پارینے کہ بلوچستان اٹی امن و ایمنی نا چاگڑد ئِ بحال کننگ اٹی ننا شہید آتا قربانیک اوارو داوخت اسکان مسکوہی 10سال آتیٹی فرنٹیئر کور نا 675ورنا شہید مسنو ہرافتے آن 26شہید آتا خاہوت آتے ہند آتا کلیت اینو ایتنہ تانکہ او تینا جند انا اُراتیٹی رہینگر ۔ داخیال آتا درشانی ئِ او جمعہ آ ایف سی نا خاہوت آتیٹی ہند آتا کلیت فراوان کننگ نا مناسبت آن اڈہلوک آ دود آن تران کرسا کرے۔ داوخت آ سدرن کمانڈ جنرل شیرافگن تون اوار ایلو آفیسر آک ہم ساڑی ئسر۔ انسپکٹر جنرل فرنٹیئر کور میجر جنرل شیرافگن پارے کہ اسہ سال اس مست ای چارج ئِ سنبھالنگ تون دا عزم انا درشانی ئِ کریٹ کہ تینا شہید آتا خاہوت آتے اوفتا باوہ پیرہ ہی آ علاقہ غاتیٹی ہند آتے جوڑ جاڑ کینہ اینو او تغ ئِ عملی وڑاٹ ثابت کرین، 70آن 26شہید آتا خاہوت آتیٹی اینو ہند آتاکلیت آتے بشخ و پانٹ کینہ و دا چرجوئی ئِ ہم برجاتخنہ انتئے کہ ننا شہید آتا قربانی تا سوب اینو بلوچستان اٹی امن نا فضا بحال مسنے ، 5ستمبر آ یوم شہدا ایف سی ئِ اڈایتنہ تانکہ نن تینا شہید آتے خراج تحسین پیش کننگ کین، شہید آتا چناتے تعلیم، سالانہ الاﺅنس و مسن تا برام تا وخت آ لب ہم ایتنہ دود انا ایسر اٹی شہید آتا خاہوت آتیٹی کلیت بشخ و پانٹ کرے۔
