کوئٹہ۔ 27مئی (اے پی پی) کمانڈسدرن کمانڈ لیفٹیننٹ جنرل عامر ریاض پارینے کہ بلوچستان اٹی دژمن ئِ دُوارہ منظم مننگ کن الیپنہ، شہداءفرنٹیئر کور نا قربانی تا بدولت اینو بلوچستان اٹی امن ئِ ، پاک فوج ، فرنٹیئر کور بلوچستان صوبہ ٹی رہینگوک آ پشتون و بلوچ آک اواری اٹ دژمن نا عزم ئِ بے سہب جوڑ کیرہ۔ داخیال آتا درشانی ئِ او جمعہ آ فرنٹیئر کوربلوچستان شہید آتا خاہوت آتیٹی ہند آتا کلیت آتے بشخ وپانٹ کننگ نا مناسبت آن اڈہلوک آ دود آن تران کرسا کرے۔ داوخت آ انسپکٹر جنرل فرنٹیئر کور میجر جنرل شیرافگن تون اوار ایلو آفیسرآک ہم شریک ئسر۔ کمانڈرسدرن کمانڈ لیفٹیننٹ جنرل عامر ریاض دود آن تران کرسا پارے کہ کنے فخر ئِ کہ ای اینو شہید آتا خاہوت آتے کن اڈ ہلوک آ دود اٹی شریک اُٹ ہراشہید آک تینا جان تا قربانی ئِ ترسا وطن عزیز نا برخلاف مروک آ سازش آتے بے سہب جوڑ کریر، شہیدی نا رتبہ ہر گہس ئِ ملیپک اللہ تعالیٰ ہراسٹ ئِ دوست تخک اودے شہیدی نا رتبہ ئِ نصیب کیک اللہ تعالیٰ قرآن پاک اٹی شہیدی نا اہمیتئِ بیان کرینے و حضور پاک ﷺ وار وار شہیدی نا تمنائِ کرینے، اوشہید آتا خاہوت آتے مخاطب کرسا پارے کہ شہید آتا قربانی تا بدولت وطن عزیز پاکستان نا صوبہ بلوچستان اٹی دژمن تا عزم آتے بے سہب جوڑ کرسا شہیدی نا جام ئِ نوش کریر اینو نما شہید آتاقربانی تا بدولت بلوچستان اٹی امن مسنے او شہید آک سیسہ پلائی دیوال اس جوڑمرسادژمن تا عزم ئِ بے سہب جوڑ کریر۔ کمانڈرسدرن کمانڈ تران کرسا پارے کہ انسپکٹر جنرل فرنٹیئر کور میجر جنرل شیرافگن چارج ئِ سنبھالنگ تون داعزم انا درشانی ئِ کرے کہ او ایف سی نا شہید آتا خاہوت آتے نہ صرف ہند بلکن مسن تا برام نا وخت آ لب ، چناتا تعلیمی وظیفہ ہم فراوان کینہ۔ اینو او عملی ثبوت پیش کرسا 26شہید آتا خاہوت آتیٹی ہند آتا کلیت آتے بشخ و پانٹ کننگ نا مناسبت آن دود اڈ تسنے ہراستاکڑزوک عمل اسے۔ اوشہید آتا خاہوت آتے باوری ترفے کہ او اوفتے اسہ حالیت اسیٹی ہم است آن دپک سدرن کمانڈ ایف سی نا شہید آتا خاہوت آتیٹی ہند آتا کلیت آتے بشخ وپانٹ کرے۔
