واشنگٹن۔ 30 اکتوبر (اے پی پی) امریکہ ٹی پاکستان نا سفیر مسعود خان سرکاری نجی بشخ انا 15 مڈکیریئر پاکستانی پروفیشنلز آتون اوڑدہی کرے و اومیت ظاہر کرے کہ فیلوشپ پروگرام نا رداٹ امریکہ غا بروک آ پاکستانی کسبی بندغ آتا گچین خذمت آتا فراوانی اوفتا لائخی تیٹی ودکی مریک۔ پاکستانی کسبی بندغ ہیوبرٹ ہمفری فیلو شیپ پروگرام نا رداٹ امریکہ نا پنی آ یونیورسٹی تیٹی چندی بشخ آتیٹی تعلیم کننگ ءُ۔ فیلو شپ آنجہانی مسکوہی امریکی نائب صدر ہیوبرٹ ہمفری تون گنڈوک ءِ، ہرا1965 آن 1969اسکان امریکی نائب صدر نا وڑاٹ خذمت سرتس۔ داپروگرام اسہ سال انا مطالعہ و کسبی آزموندہ غاتیکن پدتموک ملک آتا مڈکیریئر آتا کسبی بندغ آتا لائخی تیٹی نکھار اتنگ کن فائدہ مند ءِ ، داپروگرام پنی آ فل برائٹ ایکسچینج نا بشخ ءِ و فیلوشپ نا خواہشمند بندغ آتا گچینی اوفتا قومی سرکڑدہ غاتا لائخی و السی خذمت نا عزم انا بنداو آ کننگک۔ پاکستانی سفیر مسعود خان گروپ ءِ پارے کہ داپاکستانی طالب علم وکسبی بندغ آتیکن امریکہ نا دورہ ءِ کننگ و جہانی کہول آ آزموندہ غاتیان فائدہ ہرفنگ و گچین خذمت آتا فراوانی کن تینا لائخی تے مون آ اتنگ نا اسہ جوان ءُ موقع اسے، پاکستان و امریکہ نا نیام اٹ مریس مدتی تعلیمی تعلقداری ءِ و ہڑتوم آملک آتا ہن وبرتیٹی ودکی اتون تعلقداری تے پین سوگو کننگ کن شریداری کننگ ءُ۔ پاک امریکہ تعلقداری نا بارواٹی اوپارے کہ ہڑتوم آ ملک آک واپار و زرکاری، چاگڑدی بدلی، توانائی ، کشت وکشار، جان جوڑی و تعلیم تون اوار اہم بشخ آتیٹی شریداری ءِ پین سوگو کننگ نا کوشست کننگ ءُ۔ اوسرکاری بشخ انا پروفیشنل آتیا زور شاغا کہ او تینا کارکڑد ءِ گچین کننگ کن امریکی سرکاری ادارہ غاتا آزموندہ غاتا سخت نظراٹ مشاہدہ و مطالعہ ءِ کیر و ہیل کیر۔ جان جوڑی نا بشخ اٹی پاک امریکہ کمکاری آ گپ وتران کرسا پاکستانی سفیر پارے کہ پاکستان آخبت اٹ دینی مرض آتون مون تننگ کن ناجوڑی تا جانچ پڑتال ءِ سوگو کننگ و ویکسین نا تیاری ٹی امریکی مہارت آتیان فائدہ ہرفنگ ناچاری ءِ۔
