اسلام آباد۔ 26مئی (اے پی پی) بنجائی وزیر خزانہ سینیٹر اسحاق ڈار پارینے کہ حکومت و اپوزیشن تون ٹی او آرز کمیٹی ٹی ابتدائیہ حد اسکان اتفاق مسنے، ارٹ میکو مرحلہ ٹی ٹی او آرز آ تفصیلی ہیت و گپ مریک، اپوزیشن 15آن 2ٹک پدی ہلنگ نا پیش کش کرینے۔ پنچ شنبے آ پارلیمنٹ ہاﺅس اٹی ٹی او آرز کمیٹی نا دیوان آن گڈ احوالکار آتا نمائندہ غاتون ہیت و گپ اٹی اوپارے کہ کمیٹی ٹی خوشگوار چاگڑد اسے تون اپوزیشن تون اتفاق رائے آن معاملہ غاک مون آ ہِننگ ئُ ، ٹی او آرز آ بنائی ہیت و گپ بناءمسنے۔ اپوزیشن 15آن 2ٹک پدی ہلنگ نا پیش کش کرینے، ٹی او آرز آ باقاعدہ کاریم نا بناءاینو جمہ غان مریک۔ اوپارے کہ 4ٹک آتیا حکومت و اپوزیشن نا نیام اٹ پوروی اٹ امنائی ئِ اوکان گڈ بنجائی وزیر ریلوے خواجہ سعد رفیق احوالکار آتا نمائندہ غاتون ہیت وگپ کرسا پارے کہ اپوزیشن نا دا پاننگ سہی اف کہ سپریم کورٹ حکومتی ٹی او آرز ئِ مسترد کرینے۔ اوپارے کہ ٹی او آرز کمیٹی ٹی ابتدائیہ نا حد اسکان اتفاق مسنے ، کاریم بھلن ئِ، ہچ ئُ غلط فہمی اس ودی کننگ خواپنہ اگہ کسس کانود ئِ پرغانے و اونا آف شور کمپنی اریر تو اونا بایدے جاست و پاست مرے۔ اوکان گڈ ٹی او آرز کمیٹی نا دیوان پارلیمنٹ ہاﺅس اٹی اڈ ہلک ہراٹی حکومتی باسک آتون اوار اپوزیشن نا کنڈآن صاحبزادہ طارق اللہ ، چوہدری اعتزازاحسن ، شاہ محمود قریشی، بیرسٹر محمد علی سیف ، الیاس احمد بلور و طارق بشیر چیمہ شرکت کریر۔
