برلن۔ 11 اکتوبر (اے پی پی) جرمنی یوکرین نا کمک کن اسہ بلین یورو (1.1 بلین ڈالر) نا پوسکن آ دفاعی پیکج نا پڑو ءِ کرے۔ برطانوی خبررساں ادارہ نا رداٹ جرمن وزیر دفاع طورس پسٹوریئس تدوک آ دے پڑو کرسا پارے کہ جرمنی یوکرین نا کمک ءِ برجاتخک ہرانا اودے دمدستی وڑاٹ گرج ءِ۔ اوپارے کہ دا پوسکن آ ’’ونٹرپیکج‘‘ اتون نن بروک آ تُو تیٹی یوکرین نا سلہہ بند فوج انا آپریشنل تیاری تیٹی پین ودکی کننگ اُن۔ اوپارے کہ پوسکن آ دفاعی پیکج اٹ ودکی پیٹریاٹ ایئر ڈیفنس میزائل سسٹم، ودکی آئی آرآئی ایس۔ ٹی میزائل سسٹم و گیپارڈاینٹی ایئر کرافٹ گن ٹینک اوار ءُ۔ جرمن وزیر دفاع پارے کہ یوکرین نا اسپیشل فورس آتے گاڈی، سلہہ غاتون اوار اوار 20 ملین یورو آن زیات مالیت نا غیرمعینہ ازباب آتیان ہم کمک فراوان کننگک تانکہ اونا لائخی تیٹی ودکی کننگ مرے۔
