اقوام متحدہ ۔ 10 اکتوبر (اے پی پی) اقوام متحدہ نا سیکرٹری جنرل انتونیوگوتریش نا کنڈآن غزہ نا پٹی نا پور و گھیڑ آ بے کچ گڑتی نا درشانی ءِ کرسا پارینے کہ غزہ ٹی انسانی حالیت مہالوآن بے کچ سنگین ئس ہراداسہ پین ترندی اٹ خراب مریک۔ اونیویارک اٹی اقوام متحدہ نا ہیڈکوارٹرزاٹی صحافی تے پارے کہ او فلسطینی الس نا روا غاو و اسرائیل نا سیکورٹی گڑتی تے امنا کیک ولے اسٹ اس ہم دا دہشت گردی نا کارروائی و شاری تا خون و برمتہ نا جواز پیش کننگ کپک۔ اوداجلہو آتے دمدستی وڑاٹ بند کننگ و غٹ یرغمالی تے یلہ کننگ کن تینا خواست نا درشانی ءِ کرے۔ اوپارے کہ او غزہ ٹی زالبول و چناتتون اوار 500 آن زیات فلسطینی تا شہیدی و3 ہزار آن زیات ٹھپی مننگ نا خبرآتیان بھاز فریشان ءِ۔ بدبختی اٹ دا کچ ودنگ ءِ انتئے کہ اسرائیلی کارروائی برجاءِ۔ اوپارے کہ او اسرائیل نا روا سیکورٹی گڑتی تے امنا کیک، ولے او اسرائیل ءِ دا ہم یات ترفک کہ فوجی آپریشن اٹی جہانی انسانی کانود آ سختی اٹ عملدرآمد بایدے کننگے۔او ہمو رپورٹ آتا کنڈآ اشارہ کرے کہ اسرائیل غزہ نا تہہ ٹی جان جوڑی نا آسراتی تتون اوار اوار کثیر المنزلہ ہنکینی ٹاور و اسہ مسیت اسے میزائل جلہو آتیٹی شست کرینے۔
