اقوام متحدہ۔ 28 ستمبر (اے پی پی) اقوام متحدہ نا جنرل اسمبلی نا غیررسمی دیوان اٹی پاکستان اٹی تدوک آ سال نوکاپ آن بھلو کچ اسے آ مروک آ بھسکاری تون مون تننگ کن حکومت و الس تون یکجہتی نا درشانی ءِ کننگانے۔ اقوام متحدہ نا جنرل اسمبلی نا اسہ غیررسمی دیوان اس اڈتننگا ہراٹی دا بابت تدوک آ سال منظور کروک آ قرارداد آ عملدرآمد نا جاچ ءِ ہلنگ کن بٹنگ انگاسس ہراٹی جہانی برادری آن امداد اٹی ودکی کننگ و ملک انا مریس مدتی بحالی کن سیاسی عزم ءِ برقرارتخنگ نا خواست کننگاسس۔ دیوان اٹی اقوام متحدہ نا سیکرٹری جنرل انتونیوگوتریش ، اہم ملک آتا نمائندہ غاک تدوک آ دے پاکستان کن مخ تفی نا درشانی ءِ کرے۔ داوخت آ اقوام متحدہ نا سیکرٹری جنرل پارے کہ تدوک آ سال نوکاپ آن پاکستان نااسہ تہائی رقبہ ءِ دیر ہرفیسس، بھاز انگا علاقہ غاتیان دُن تو نوکاپ نا دیر شیف مسنے ولے زہمی علاقہ غاتا بحالی کن پاکستان نا گرج آک پدریسہ ساڑی ءُ، دیوان اٹی منظور کروک آ قرارداد اٹی چاگڑدی بدلی تا نتیجہ ٹی بروک آ نوکاپ آن مروک آ بھسکاری تون مون تننگ کن حکومت پاکستان والس تون یکجہتی نا درشانی ءِ ہم کننگا۔ پاکستان اٹ دا نوکاپ آن 3 کروڑ 30 لکھ بندغ زہمی مسر، 1700 آن زیات بندغ زوال کریر و کم و ود 80 لکھ آ بندغ بے اُرا مسر، ہرافتیان بھاز انگا مخلوق داسہ ہم تمبو و عارضی آ اُراتیٹی رہینگ انگ ءُ۔
