بغداد۔ 27 ستمبر (اے پی پی) عراق نا صوبہ قطبی نینویٰ نا ضلع ہمدانیہ ٹی برام اسے نا اسہ دود اسے ٹی خاخر لگنگ آن بادشاہ و برامی تون اوار 100 آن زیات بندغ زوال و 150 ٹھپی مسنو۔ برطانوی میڈیا نا رداٹ نینویٰ نا ڈپٹی گورنر حسن العلق پارے کہ 113 بندغ آتا مرک پک مسنے۔ سرکاری میڈیا مرک آتا کچ 100 و خت اس کہ ٹھپی تا کچ ءِ 150 پارینے۔ سرکاری میڈیا نا رداٹ ہندی شاری دفاع نا پاننگ ءِ کہ دود اٹی جشن اٹی مروک آ آتش بازی آن ایونٹ ہال اٹی خاخر لگا۔ بنائی معلومداری تا رداٹ خاخر لگنگ نا سوب آن شادی ہال اٹی ماڑی ملبہ نا ڈھیر اس جوڑ مس۔ ہندی میڈیا نا رداٹ زوال کروک آتیٹی بادشاہ و برامی ہم اوار ءُ۔ برام نا دود اٹی خاخر لگنگ نا داواقعہ سے شنبے ناشام آ قطبی صوبہ نینویٰ نا ضلع ہمدانیہ ٹی پیش بس۔ عراقی سول ڈیفنس نا ڈائریکٹوریٹ نا پاننگ ءِ کہ خاخر لنگ آن ہال انا گڑاس بشخ تمار ہرانا سوب آن بے کچ آتش گیر، کم نہاد و بے آب اٹ تعمیراتی گڑاتا کاریم اٹ اتنگ ئس ہرا خاخر لگنگ نا منہ منٹ آتیٹی تما۔ عینی شاہدآتا رداٹ خاخر ہندی وخت انا رداٹ نن نا کم وود 10:45آ لگا، داوخت آ سد آ مخلوق برام نا دود اٹی ساڑی ئسر۔
