اسلام آباد۔ 26مئی (اے پی پی) سلاہکار خارجہ سرتاج عزیز 21مئی آ ڈرون جلہو اٹی ملااختر منصور نا تپاخت مننگ نا تصدیق ئِ کرسا پارینے کہ طالبان راہشون نا تپاخت اوغان تنازعہ ئِ پین پیچیدہ جوڑ کرینے۔ ڈی این اے ٹیسٹ پورو مننگ آن گڈ لاش ئِ حوالہ کننگک۔ دا گام آن اوغانستان پین نزوری نا گواچی مریک ۔ پاکستان و بھارت نا نیام اٹ جامع مذکرات زوت مریک۔ ڈرون جلہو پاکستان نا وت واجہی و اقوام متحدہ چارٹر نا اصول آتا خلاف ورزی ئِ ۔ پاکستان دا معاملہ آ امریکہ ئِ تینا گھڑتی آن معلومدار کرینے۔ امریکہ ئِ دا ہیت آ قائل کینہ کہ ڈرون جلہو و مذاکرات اسیجا چلینگ انگ کپسہ۔ پنچ شنبے آ دفترخارجہ ٹی پریس بریفنگ نا وخت آ صحافی تا جتا سوج آتا ورندی ئِ ترسا سلاہکار خارجہ پارے کہ ملامنصور نا تپاخت اوغان تنازعہ ئِ پین پیچیدہ جوڑ کرے۔ غٹ اشارہ غا داہیت انا تصدیق ئِ کیرہ کہ 21مئی آ ڈرون جلہو اٹی تپاخت کروک آ بندغ ملامنصور ئس ہرا جعلی پن آن سفر کریکہ۔ اوپارے کہ ڈی این اے ٹیسٹ آن گڈ لاش ئِ حوالہ کننگک۔ سرتاج عزیز پارے کہ جلہو پاکستان نا وت واجہی و اقوام متحدہ چارٹر نا اصول آتا خلاف ورزی ئِ۔ نن دا چرجوئی ٹی امریکہ ئِ تینا شدید گھڑتی آن معلومدار کرینن۔ نن سمجھنہ کہ دا گام اوغان امن عمل ئِ چٹفینے۔ اوپارے کہ 18مئی آ چار کڑدہ ہی رابطہ رڑ داہیت آ اتفاق کریسر کہ سیاسی مذاکراتی ایسری گچینئُ آپشن اسے و طالبان ئِ مذاکرات نا میز آ اتنگ کن کوشست آتے جاری تخنگ نا عزم کریسس ، ولے دا افہام و تفہیم نا شرف ئِ کننگ تو۔ اوپارے کہ اسہ سال اسیان ہم کم وخت اٹی امن عمل ئِ دوارہ لتاڑنگا۔ ننا دا موقف ئِ کہ اوغان تنازعہ نا فوجی ایسری ممکن اف۔ مسکوہی پانزدہ سال انا وخت واک انا کاریم اٹ اتنگ آن اوغانستان اٹی امن بحال مننگ کتو۔ سرتاج عزیز پارے کہ پاک اوغان سیم آ دہشت گرد، سمگلر و ڈوہدار بندغ آتا توننگ کن موثر بارڈر مینجمنٹ نا گرج ئِ۔ دا چرجوئی ٹی تین پہ تینی سیکورٹی کن اوغان حکومت نا کمکاری بے کچ المی ئِ۔ اوپارے کہ پاکستان اٹی بھلو کچ اسیا اوغان مہاجر آتا ساڑی گری سیکورٹی رسک اس جوڑ مسنے۔ دہشت گرد و عسکریت پسند آک مہاجر آتا کیمپ آتے تینا پناہ گاہ تا وڑاٹ کاریم اٹ اتیرہ۔ جہانی برادری مہاجر آتا واپسی کن ہڑدڑی بنداوتیا گچین گام گیج چست کیر ۔ سرتاج عزیز پارے کہ اوغانستان اٹی امن نہ صرف پاکستان بلکن غٹ ڈیہہ نا مفاداٹی ئِ۔ سلاہکار خارجہ ایرانی بندرگاہ چاہ بہار نا بابت اسہ سوج اسینا ورندی ئِ ترسا پارے کہ گوادر و چاہ بہار پورٹ ئِ سسٹر پورٹ گوندنگ نا صلاح ئس ، گوادر و چاہ بہارپورٹ آن ڈیہہ ٹی اقتصادی سرجزآتیٹی ترندی بریک۔ اوپارے کہ اوغانستان تون ٹریڈ ٹرانزٹ اٹی گچینی بننگ ئِ دا چرجوئی ٹی انفراسٹرکچر نا بھلو ڈٹ زیر غور ئُ۔ ڈیہہ نا غٹ ملک آتیان علاقائی کمک برجاسلک۔ سرتاج عزیز اسہ سوج اسینا ورندی ئِ ترسا پارے کہ دہشت گردی نا برخلاف جنگ اٹی ہزار آ پاکستانی سیکورٹی فورسز و شاریک جان تا قربانی ئِ تسنو وخت اس کہ ملکی معیشت ئِ 110 ارب ڈالر آن زیات نا نسخان مسنے۔ دہشت گردی کن ننا کوشست آک جاری ئُ۔ نن قبائلی علاقہ غاتیٹی رٹ اڈتسونن۔ سرتاج عزیز پارے کہ امریکہ ئِ ہم دا ہیت انا احساس ئِ ، نن امریکہ غان کمک خوانہ۔ اوپارے کہ 2001و 2012ءنا نسبت ہراتم 2013ٹی مسلم لیگ (ن) نا حکومت اڈ ہلک تو ڈرون جلہو آتیٹی بھلو حد اسسکان کمتی بس۔ سرتاج عزیز پارے کہ نن امریکہ ئِ داہیت آ قائل کینہ کہ ڈرون جلہو و امن مذاکرات اسیجا چلینگ انگ کپسہ، اگہ ڈرون جلہوآک برجاسلیسر تو اوغانستان اٹی مذاکراتی عمل امر مون آ کاہک۔
