روس انا ننا اِرا سفارتکار آتے بے دخل کننگ غیرکانودی ءِ، امریکہ

واشنگٹن۔ 15 ستمبر (اےپی پی) امریکہ پارینے کہ روس انا ننا اِراسفارتکار آتے ملک بدر کننگ غیرکانودی ءِ، و امریکہ نا کنڈآن دانا ورندی ءِ تننگک۔ برطانوی خبررساں ادارہ نا رداٹ امریکی محکمہ خارجہ پارینے کہ روس انا کنڈآن ننا اِراسفارتکاری ملازم آتے ملک بدر کننگ بے سوب ءِ۔ روس اٹی امریکی سفارت خانہ نا اسہ کارندہ اس ہم روسی خبررساں ادارہ تاس ءِ خصوصی بیان ترسا پارینے کہ امریکہ روس ءِ امریکی سفارتکار آتا بےدخلی نا ورندی ءِ ایتک۔ حوالی نا رداٹ امریکہ دا دوبہ غاتے پورو وڑاٹ مسترد کرینے ہرافتا بنداو آ ماسکو ٹی امریکی سفارت خانہ نا اِرا ملازم آتے ناپسندیدہ شخصیت گوندنگاسس۔ یات سلے روسی کمامدارآتا رداٹ ہندا امریکی سفارت کار اسہ مسکوہی روسی ملازم کن رابطہ ایجنٹ ئس۔ داہڑتوم آتے دا سال انا بناٹی دزگیرکننگاسس۔ اوڑا یوکرین نا جھیڑہ نا بابت معلومداری امریکہ ءِ فراوان کننگ نا شبہ ئس۔ روسی پڑو آن پد امریکہ داگام ءِغیرکانودی گوندانے۔ داہیت ہمووخت آ مون آ بس ہراتم روسی وزارت خارجہ اینونا اول آتیٹی داہیت ءِ پک کرے کہ ہرا اِرا سفارتکار آتے ناپسندیدہ شخصیت گوندنگانے او ماسکو ٹی امریکی سفارت خانہ نا فرسٹ و سیکنڈ سیکرٹری جیفری سیلن و ڈیوڈ برنسٹین ئس۔اومستی پارے کہ اودے 7 دے انا تہہ ٹی روسی گل زمین آن بایدے پیش تمنگے۔ اووضاحت کرے کہ ہڑتوم آ سفارتکار آک رابرٹ چنوف پنی ءُ اسہ روسی شاری تون رابطہ کرسا غیرکانودی سرجزوکرے۔ اوڑا غیر ملک اسے تون اودیم کمکاری نا دوبہ ءِ و اودے روسی قومی سلامتی ءِ نسخان تننگ نا مسخت آن مالی انعام تا بدلہ مشن تننگاسس۔