واشنگٹن۔ 12 ستمبر (اے پی پی) امریکہ ٹی پاکستان نا سفیر مسعود خان پاکستانی نژاد امریکی کاروباری بندغ آتیا زور شاغانے کہ او پورو پت اتون تینا ملک اٹی زرکاری کیر۔ سفارت خانہ نا کنڈآن جاری پریس ریلیز نا رداٹ اوامریکی ریاست ٹیکساس نا شار ڈالاس اٹی پاکستانی امریکن بزنس فورم(پی اے بی ایف) نا سالانہ ایوارڈ بینکوئٹ2023نا وخت آ تران کرسا پارے کہ نن امریکہ و خلیجی ڈیہہ انا کاروباری بندغ آتے پاکستان اٹ زرکاری نا سلہ خلنگ ءِ، چین مہالو آن سی پیک نا رداٹ ڈٹ آتا کمک اٹ زرکاری کننگ ءِ۔ اونا پاننگ ئس کہ نن خلیجی ڈیہہ تے صنعتی بشخ آتیٹی زرکاری نا سلہ خلکونن و او بھاز انگا یورپی و قطبی امریکی فرم آتون شریداری کننگ ءِ، داڑان پاکستان اٹ پین زرکارینا اسہ بھاز بھلو موقع اس فراوان مننگ ءِ چونکہ ہموڑے زرکاری کن بنداوی پنجر ساڑی ءِ ہنداسوب آن دا مارکیٹ اٹی گام تخر و پدی مننگ نا جاگہ غا پورو پت اتون زرکاری کیر، پاکستان زرکاری کن تیار ءِ۔ مسعود خان پی اے بی ایف نا چیئرمین وقار خان، صدر انور اعظم و ایلو باسک آتا منت واری ءِ ہرفے کہ او ملک انا کاروباری لائخی ءِ تالان کننگ نا موقع فراوان کرے۔ دود اٹی ریاست ٹیکساس نا نمائندہ سلمان بھوجانی ، میئر رچرڈ سن، میئر باب ڈولی، شمس العارفین و عبدالخبیر ئسک بشخ ہلکر۔ اوسرکڑدہ پوریاگر و صنعت کار آتیان تران کرسا پارے کہ 80 امریکی کاروباری ادارہ غاتا ساڑی گری اتون پاکستان اٹ زرکاری کن مہالوآن گیشتر انفراسٹرکچر ساڑی ءِ و نمے زرکاری نا کچ ءِ ودفوئی ءِ، پاکستان اٹ داڑکن بھلو وارخواہی اس ساڑی ءِ۔ اوکاروباری سرجزو زرکاری ءِ آوار کننگ کن پاکستان اٹ ریگولیٹری نظام، کاروبار کننگ اٹ آسانی، منافع نا واپسی نا بابت ویل و کاروباری برادری و ممکنہ زرکارآتے مون تروک ویل آتے ایسر کننگ کن ڈالاس، ہیوسٹن یا امریکہ ٹی اسہ فورم اسے نا جوڑ کننگ نا سلاہ پیش کرے۔
