اسلام آباد۔ 26مئی (اے پی پی) بنجائی سیکرٹری دیر و بجلی محمد یونس ڈھاگہ پارینے کہ بجلی نا لوڈشیڈنگ معیشتئِ بھاز نسخان تسنے، ساڑی آ حکومت نا گچین گام گیج آتا سوب بجلی نا نسخان آتیٹی کمتی بسنے، سلوک آ پیسہ غاتا وصولی گچین مسنے و پیداوار ئِ ودفنگ کن کیہی ڈٹ آتیا ترندی اٹ کاریم جاری ئِ۔ ننا ملک اٹی مارکیٹ آک نن نا یانزدہ بجہ اسکان ملوک ئُ ہرانا سوب آن بجلی زیان مریک ، صوبہ غاتون اواری اٹ دا ویل ئِ ہم ایسر کننگ نا کوشست کینہ، 2018ءٹی لوڈشیڈنگ نا پن ہم سلپک۔ اوداخیال آتا درشانی ئِ پنچ شنبے آ داڑے بجلی نا پیداوار نا بابت آن ہشت میکو سالانہ کانفرنس آن تران کرسا کرے۔ محمد یونس ڈھاگہ پارے کہ لوڈشیڈنگ پاکستان نا متکن ئُ ویل اسے، ساڑی آ حکومت ہراتم اقتدار اٹی بس تو گردشی کڑزآک 15ارب روپئی ماہانہ نا حساب آن ودارہ و ہچ ئُ پوسکن ئُ زرکار اس بجلی نا بشخ اٹی زرکاری کن تیار ہلوکہ ، ٹرانسمیشن لین تا نظام ہم بوسیدہ مسوسس و او بجلی نا زیات بھاریم ئِ سگنگ کتوکہ، ولے داسا حالیت آتیٹی نمان گچینی بسنے ، سلوک آ پیسہ غاتا 93درسد وصولی ئِ باوری جوڑ کننگانے، بجلی نا نسخان آتے کم کننگ اٹی نن سرسہب مسونن، 10آن 6ڈسٹری بیوشن کمپنی تا کارکڑد گچین مسنے، گردشی کڑزآک 320ارب روپئی آ منجمند کننگانو و آئی پی پیز ئِ 61ارب روپئی وخت اس کہ پی ایس او ئِ 24ارب روپئی نا ادائیگی کننگانے ہرانا سوب آن زرکار آتابجلی نا بشخ اٹی پت بحال مسنے۔ اوپارے کہ 2018ءٹی بجلی نا پیداوار 20آن 30ہزار میگاواٹ اسکان رسینگک۔ مسکوہی سال بجلی نا پیداوار اٹی ریکارڈ ودکی مس و دا 16000 میگاواٹ اسکان ہنانے داسا بجلی نا ترسیل نا نظام ہم گچین ئِ۔ داوخت لوڈشیڈنگ اٹی صفائُ کمتی اس بسنے و 2018ءٹی لوڈشیڈنگ نا پن اسکان ہم سلپک۔ داسو ہائیڈرل پاور پروجیکٹ آن 4200 میگاواٹ، تربیلا فور ودیکی ڈٹ آن 1410 میگاواٹ ، تربیلا فائیو ودیکی ڈٹ آن 1410 میگاواٹ، نیلم جہلم ہائیڈرل پاور پروجیکٹ آن 969 میگاواٹ وخت اس کہ سولر ڈٹ آن 2017ءٹی اسہ ہزار میگاواٹ بجلی سسٹم اٹی بریک ہنداوڑ تہوآن بجلی ودی کروک آ ڈٹ آتیا ہم کاریم ترندی اٹ جاری ئِ، 2018ءاسکان متبادل توانائی نا ڈٹ آتیان تقریباََ 3ہزار میگاواٹ بجلی دوئی مننگ شروع مریک۔ اوپارے کہ ننے بجلی نا بچت نا کنڈاہم توجوہ تننگ نا گرج ئِ، اسہ میگاواٹ بجلی نا بچت اسہ میگاواٹ بجلی ودی کننگ آن جوان ئِ۔ اوپارے کہ ننا ملک اٹی مارکیٹس آک شام انا یانزدہ بجہ اسکان ملوک ئُ ہرانا سوب آن بجلی زیان مریک۔ اوپارے کہ الس اٹی بجلی نا ازباب آتے کاریم اٹ اتنگ کن ہم شعور بیدار کننگ نا گرج ئِ تانکہ بجلی زیان مفئے ، اسہ سوج اسینا ورندی ٹی اوپارے کہ تھرکول اٹی جدید ٹیکنالوجی کاریم اٹ اتنگ انگ ئِ ہرانا سوب آن اونا منفی ماحولیاتی زئم آک مفسہ ۔
