اقوام متحدہ۔ 06 ستمبر (اے پی پی) اقوام متحدہ نا 193 باسکی جنرل اسمبلی نا78 می سیشن کیریبیئن ملک ٹرینیڈاڈاینڈ ٹوباگو نا کماشی ٹی بناکرینے و پاکستان دا وخت آ جہانی چیلنج آتون مون تننگ کن ڈٹ بندی نا گرج آ زور شاغانے۔ ٹرینیڈا ڈاینڈ ٹوباگونا سفیر ڈینس فرانسس تینا بنائی تران اٹی باسک ملک آتیا زور شاغا کہ او نزور آ ملک آتے واکدار کرسا امن ءِ مون آدیر و بدلی و پائیداری کن درکار وسیلہ غاتے کاریم اٹ اتسا اسیجائی شونہالی فراوان کرسا جدت پسندی و ٹیکنالوجی نا حامل ملک آتیان فائدہ ہرفسا شونداری ءِ ترند کیر۔ اوداہیت انا اعتراف ءِ کرے کہ دنیا ءِ داوخت آ پیچیدہ چیلنج مون تروک ءِ ہرافتے ٹی چاگڑدی بدلی، جھیڑہ و نیزگاری اوار ءُ، ہرافک امن نا حالیت آتے پین پیچیدہ کرینو وخت اس کہ جغرافیائی سیاسی تقسیم کثیر الجہتی نظام تا بارواٹی شک و شبہ ءِ ودی کرینو۔ دود آن پد اقوام متحدہ ٹی پاکستان نا سفیر منیر اکرم پارے کہ ہندا جہانی چیلنج آتون مون تننگ کن ڈٹ بندی نا گرج ءِ۔ اوپاکستان نا سرکاری خبررساں ایجنسی اے پی پی ءِ تروک آ اسہ انٹرویو اسے ٹی پارے کہ جنرل اسمبلی نا 78 می دیوان اسہ پیچیدہ جہانی چاگڑد اسے ٹی مننگ ءِ ، ہراٹی خاص وڑاٹ یورپ و افریقہ ٹی جھیڑہ، ایشیاٹی ودوک آ بےچیٹی، جہانی زرگزران نا سست روی، 60 پدتموک ملک آتا مالی تنکی آن دوچار مننگ اوار ءِ و داسکان دا چیلنج آتون مون تننگ نا وڑوڈول آتا بارواٹی حکمت عملی پیدوار اف۔ جنرل اسمبلی نا 78 می بنائی سیشن اٹ اقوام متحدہ نا ڈپٹی سیکرٹری جنرل آمنہ محمد اقوام متحدہ نا سیکرٹری جنرل انتونیوگوتریش نا نمائندگی ءِ کرسا تینا تران اٹی داہیت آ زور شاغا کہ جنرل اسمبلی ، امن پائیدار شونداری و انسانی حق اکن ننا اسیجائی عزم و انسانیت نا نمائندگی ءِ کرے۔
