اقوام متحدہ۔ 29 اگست (اے پی پی) اقوام متحدہ نا جنرل اسمبلی 26 جنوری آ چاگڑد دوست توانائی نا جہانی دے ءِ اڈتننگ کن پاکستان و پاناما نا کنڈآن اسیجائی وڑاٹ پیش کروک قراردادنا امنائی سلاہ اٹ منظوری ءِ تس۔ 193 باسکی جنرل اسمبلی چاگڑد نا رکھ اکن پیش کروک قرارداد نا متن آن بیدس ووٹنگ نا منظوری ءِ تس۔ مسودہ پیش کرسا پاناما نا مندوب مارکوواکونسیپ سیون جارامیلو پارے کہ چاگڑد دوست و قابل تجدید توانائی نا ذریعہ نا کنڈا گدریفنگ ساڑی آ چاگڑدی و راجی اقتصادی چیلنج آتون مون تننگ و کرہ ارض آ انسانی بقا و بہبود نا ضمانت کن المی ءِ۔ داوخت آ امریکہ نا نمائندہ پارے کہ امریکی ڈل امنائی سلاہ اٹ بشخ ہلک انتئے کہ توانائی نا بشخ انا جہانی کہول آ کاربن گیس آتا پیش تمنگ اٹ اِرا چارک آن زیات بشخ ءِ، ولے فرانسیسی نمائندہ یورپی یونین نا کنڈآن ہیت کرسا داہیت آ است ہسونی نا درشانی ءِ کرے کہ دا قرارداد توانائی و آب و ہوا نا نیام اٹ غیر متنازع تعلق نا رداٹ و گچین وڑاٹ عکاسی ءِ کپک و داکہ دا قرارداد اٹی کلینر فوسل فیول انرجی نا حوالہ ساڑی ءِ۔
