اوٹاوا۔ 22 اگست (اے پی پی) کینیڈا نا شار وینکوور اٹی پاکستان قونصل خانہ و ہندی پاکستانی پوریاگر تا تنظیم پاکستان ویسٹرن کینیڈا ٹریڈ ایسوسی ایشن نا کنڈآن پاکستان ایکسپو 2023نا بست وبند ءِ کننگا ہراٹی پاکستان و مچ آ کینیڈا غان پوریاگر، کاروباری خواجہ، درآمد کروک و صارف آتا اسہ بھلو کچ اس بشخ ہلکر و پاکستانی گڑاتے ہلکر۔ دااِرادے ئی کانفرنس نا مسخت پاکستان وکینیڈا نا نجی کاروباری بشخ اٹی کمکاری و تین پہ تینی شریدار آتے مون آ دننگ آن بیدس کینیڈا ٹی پاکستانی مصنوعات و خذمت آتا خواست و بہا ءِ مون آ دروئی ئسک۔ کانفرنس نا بناءِ کینیڈاٹی پاکستان ناہائی کمشنر ظہیر اے جنجوعہ کرے۔ داوخت آ وینکوور اٹی پاکستان نا قونصل جنرل جانباز خان و پاکستانی کینیڈین پوریاگر، دوکاندار، پروڈیوسر، پوریاگر ، وزرا و صوبائی اسمبلی نا باسک آتا بھلو کچ اسے ٹی بشخ ہلکر۔ دود اٹی پاکستان نا چندی بشخ آتیان بروک آ پوریاگر و برآمد کندگان آتا اسہ بھلو ڈل اس ہم بشخ ہلکر۔ سے شنبے نادے آپاکستان ہائی کمیشن آن جاری اسہ پریس ریلیز اسے نا رداٹ دود انا بنائی گالاآن تران کرسا ہائی کمشنر ظہیر اے جنجوعہ اسہ چنکو وخت اسے ٹی دیکی کینیڈا ٹی تینا وڑنا اولیکو و بھلا پاکستان ایکسپو ناتغ ءِ حقیقت نا دروشم اس تننگ آ منتظمین آتا ستاءِ کرے۔
