راولپنڈی۔ 18 اگست (اے پی پی) نگراں بنجائی وزیر حوالکاری و شینکاری مرتضیٰ سولنگی جمعہ نادے آ راولپنڈی ٹی مسکوہی قومی اسمبلی نا باسک طاہرہ اورنگزیب نا اُراغا ہنا و مسکوہی بنجائی وزیر حوالکاری و مسلم لیگ (ن) نا ترجمان مریم اورنگزیب تون اوڑدہی کرے۔ مسکوہی وزیرحوالکاری مریم اورنگزیب نگران وزیرحوالکاری جوڑ مننگ آ مرتضیٰ سولنگی ءِ مبارکبادی تس و دعاکرے کہ نی دا قومی زمواری ٹی سرسہب مریس۔ نگراں وزیرحوالکاری مرتضیٰ سولنگی مریم اورنگزیب نا خاہوت و چناتتون ہم اوڑدہی کرے۔ داوخت آ نگران بنجائی وزیر مریم اورنگزیب ءِ 16 تُواٹی وزارت حوالکاری ءِ گچین وڑاٹ چلیفنگ آ مبارکبادی پیش کرساپارے کہ پیمرا(ترمیمی) بل 2023ء نا جوان کانود سازی نا جمہوری مزاج و سلابت نا کسب نا کمال پک مس۔ اوپارے کہ مریم اورنگزیب کارکڑد نا ہرا آب اس قائم کرے، کوشست مریک اونا تسلسل ءِ برجاتخنگ کیو۔ نگران وزیرحوالکاری مریم اورنگزیب تون ملک انا جم حالیت و وزارت حوالکاری و شینکاری نا بابت امور تیا گپ وتران کرے۔ داکان مست بننگ آ مریم اورنگزیب تینا لمہ طاہرہ اورنگزیب و ایلوخاہوت تون اوار مرتضیٰ سولنگی ءِ بخیر کرے و اودے پھل آتا گلدستہ اس ہم پیش کرے۔ نگران وزیرحوالکاری نیک است خواہی نا درشانی و مبارکبادی آ طاہرہ اورنگزیب، مریم اورنگزیب، حسن اورنگزیب و ایلو خاہوت نا منت واری ءِ ہرفے۔
