لندن۔ 16 اگست (اے پی پی) برطانیہ و یورپ اٹی رہینگوک آ کشمیریک و اوفتا مخ تف آک 15 اگست ءِ بھارت نا یوم آزادی ءِ تہاردے انا وڑاٹ اڈتننگ کن برانزی مچی اس کریر و بھارت نا برخلاف و بھارت نا غیرکانودی کوزہ ٹی جموں وکشمیر نا آجوئی نا حق اٹی نعرہ خلکر۔ کشمیر میڈیا سروس نا رداٹ مچی کروک آک جہانی برادری نا چکار ءِ کشمیری و سکھ آتیا بھارتی ظلم و جور انا کنڈا کرفسا پاریر کہ بھارت ءِ یوم آزادی ءِ اڈتننگ نا ہچ ءُ حق اس اف انتئے کہ کشمیریک بھارت نا ناروا کوزہ ٹی زند ءِ تیر کننگ آ بیوس ءُ۔ مچی کروک آک لندن اٹی بھارتی ہائی کمیشن، برمنگھم اٹی بھارتی قونصل خانہ و ڈنمارک نا دارالحکومت کوپن ہیگن اٹی بھارتی سفارت خانہ نا پیشن مچ مسر و دا قول ءِ پوسکن کریر کہ ہراتم اسکان کشمیر نا السءِ بھارت نا ناروا کوزہ غان آجوئی ملپک، ہمووخت اسکان آسرات تولپنہ۔ تحریک کشمیر برطانیہ نا صدر فہیم کیانی اسہ بیان اسے ٹی پارے کہ ہر قوم آزاد مرے و شاریک آجوئی آن بایدے لطف اندوز مریر۔ ولے اواست ہسونی نا درشانی ءِ کرے کہ بھارت کشمیری تے اوفتا حق آن محروم کننگ ءِ۔ ورلڈ سکھ پارلیمنٹ نا باسک رنجیت سنگھ بیان اٹی پارے کہ ہراتم جہانی کانود نا ہیت بریک تو دا پوسکن آ دوراٹی بھارت نا مجرمانہ طرزعمل، حق خودارادیت آن انکار و ایلو قوم تے شیف خلنگ کن نسلی کشی ءِ پالیسی نا وڑاٹ کاریم اٹ اتنگ نا پین درور ملیپک۔ اوپارے کہ سکھ آک تینا وطن ءِ بھارتی کوزہ آن آجو کرفنگ نا عزم کرینو۔ اوپارے کہ خالصتان بھارت نا غیرکانودی کوزہ ٹی جموں وکشمیر اٹی آجوئی اتون ڈیہہ اٹی پائیدار امن اس اتیک ہرا حریف واکدارآتا نیام اٹ بھسکار جنگ انا دنگ آٹی ءِ۔
