بیجنگ۔ 08 اگست (اے پی پی) چین پارینے کہ او برکس ملک آتا نیام اٹ واپاری و اقتصادی کمکاری ءِ مون آ دننگ کن حقی گام گیج آتا خواہندار ءِ۔ روسی خبر رساں ادارہ نا رداٹ چینی وزیر واپار وانگ وینتاؤ تدوک آ دے برکس ملک آتا واپار و اقتصادیات نا وزیر آتا دیوان اٹی پارے کہ اوفتا ملک برکس اٹی واپاری و اقتصادی بشخ آتیٹی کمکاری نا مون آ دننگ کن گچین گام گیج آتیکن تیار ءِ، چین جہانی شونداری ٹی جوان بشخ شاغنگ کن تینا پورو کوشست کیک۔ اوبرکس ملک آتیا زور شاغا کہ او مون آ بروک منڈی تیٹی ہم آہنگی ءِ سوگو کیر و ڈیجیٹلائزیشن و چاگڑدی شونداری ءِ آسان کیر۔ اوزور شاغا کہ جہانی زرگزران نا بحالی کن برکس نا کوشست آتیٹی پوسکن ءُ ساہ اس شاغنگ کن امنائی سلاہ نا بنداو آ کثیر جہتی کمکاری نا فارمیٹس نا دفاع ءِ کننگ المی ءِ۔ اونا پاننگ ئس کہ چینی حکومت مارکیٹ میکانزم تیار و کاروباری چاگڑد ءِ گچین کیک، داڑان ننے اسہ بھلو مارکیٹ اس جوڑ کننگ و مون آ بروک مارکیٹ آتا زرگزران و پدتموک ملک آتیکن زیات سازگار حالیت ودی کننگ اٹ کمک رسینگک۔
