واشنگٹن۔ 24 جولائی (اے پی پی) امریکہ ٹی پاکستان نا سفیر مسعود خان تعلیمی پروگرام نا رداٹ امریکہ نا دورہ ءِ کروک آ 25 پاکستانی طالب علم آتیا تالان ٹولی آ زور شاغانے کہ او تینا ذہنی افق ءِ ودفنگ و پوسکن آمعلومداری نا دوئی کننگ کن دا تعلیمی پروگرام ءِ اسہ موقع سے نا وڑاٹ کاریم اٹ اتیر۔ سٹڈی آف یو ایس انسٹی ٹیوٹس (ایس یوایس آئی ) پروگرام نا مسخت پاکستان و امریکہ نا نیام اٹ چندی دودوربیدگ آتاحامل بندغ آتا نیام اٹ ہم گرنچی و تعلیمی کمکاری ءِ مون آ دننگ ءِ۔ 5 ہفتہ غاتیا تالان دا سالانہ پروگرام 2010اٹی بناکننگا۔ پاکستانی سفیر پارے کہ 1950 نا دہائی آن ہلیس اینو اسکان تعلیم نا بشخ ہڑتوم آ ملک آتا نیام اٹ اسہ سوگو ءُ رابطہ اس مسنے۔ اوتدوک آ دے طالب علم آتون اوڑدہی ٹی اوفتے مبارکبادی ترسا پارے کہ اوفتا گچین کاری ننا گمرناسوب ءِ۔ اوپارے کہ دا معلومداری و مہارت آتا ہل و تس انا عمل ءِ و نم داکان دوئی کروک قابل قدر معلومداری تے تینا ملک آ دیرے۔ پاکستانی سفیر امریکی حکومت و ایس یو ایس آئی پروگرام نا اڈتننگ اٹ اوار بندغ آتا ہڑتوم آ ملک آتا نیام اٹ تعلیمی کمکاری ءِ مون آدننگ نا عزم و کمکاری آ منت واری ءِ ہرفے۔ اوپاکستانی طالب علم آتا میزبانی آ یونیورسٹی آف میسا چوسٹس، ایم ہرسٹ و امریکی مینٹورزآتا ہم ستا ءِ کرے۔ پاکستانی سفارت خانہ نا کنڈآن جاری پریس ریلیز نا رداٹ سفیر پاکستانی طالب علم آتا ڈل اتون گپ وتران کرے۔ داوخت آ طالب علم آک تینا آزموندہ غاتا بارواٹی معلومدار کرسا انفرادی و راجی کہول آ نمان تنظیمی مہارت، ریاستی و بنجائی کہول آ پالیسی تا جوڑ کننگ و اوفتیا عملدرآمد ، گپ وتران نا ماحول ، تنوع ءِ اختیار کننگ، اوار مننگ نا جوزہ، بریبروارخواہی تا فراوانی و تینا حق انا رکھ ءِ کروک آ باخبربندغ آتا ساڑی گری نا ستاءِ کرے۔ اوامریکی راج انا اسہ متعین پلو اسےنا وڑاٹ امریکی تغ ءِ عملی دروشم اس تننگ اٹ سرسہبی نا بارواٹی معلومدار کرے۔ پاکستانی سفیر طالب علم آتا آخبت کن نیک است خواہی نا درشانی ءِ کرسا پارے کہ پاک امریکہ تعلقداری ءِ سوگو کننگ کن اوفتا پدریسہ کمکاری نا چاری ءِ۔
