جنیوا۔ 06 جولائی (اے پی پی) قرآن پاک نا بے شرفی آ او آئی سی ٹولی نا کنڈآن پاکستان نا درخواست آ اقوام متحدہ نا ہیومن رائٹس کونسل اٹی شرہ 11 جولائی آ مریک۔ او آئی سی نا کنڈآن جاری ٹویٹ اٹی پاننگانے کہ ہیومن رائٹس کونسل قرآن پاک نا بے شرفی آ دمدستی شرہ کننگ نا فیصلہ کرینے۔ او آئی سی نا کنڈآن دا بابت بیان جنیوا ٹی پاکستان نا آخبتی نمائندہ سفیر خلیل ہاشمی جاری کرینے ہراٹی او ہیومن رائٹس کونسل نا 53 می دیوان نا صدر آن گڑاس یورپی و ایلو ملک آتیٹی قرآن پاک نا وار وار آ بے شرفی تون اوار مذہبی خار انا السی کہول آ مروک آ خطرناک گام گیج آتیا سجفنگ و اونا توننگ کن دمدستی شرہ نا اڈتننگ نا خواست کرینے۔ اوپارے کہ ہیون رائٹس کونسل نا ساڑی آ صدر ءِ دابارواٹی 3 جولائی آ اسہ چٹھی اس مون تننگاسس ہراٹی دمدستی شرہ نا مسخت ءِ بیان کننگا نے کہ نن دا ڑا ناپاک جسارت آ بامعنی شرہ انت اکن خوانہ۔ اوپارےکہ تدوک آ ہفتہ عئید انادے و اسہ مسیت اسے نا پیشن آ قرآن پاک ءِ ہُشنگ و بے شرفی کننگ اسہ جتا ءُ عمل اس الوکہ، ساڑی آ تُوتیٹی دا ششمیکو موقع ئس ہر امذہبی خار انا پیدوار ، ودوک و پدریسہ عمل ناپوروی عکاسی و حکومتی لیسن نا رداٹ نمائندگی ءِ کیک ۔ اوپارے کہ داغٹ اسلاموفوبک کارروائی مہالو کننگار و ولدا نن خنان کہ دا کارروائی تے درشانی سلاہ نا آجوئی نا حق اتون ملفسا اوفتا آخبت ددفاع ءِ کننگا۔
