بھارت اٹی مسلمان تا برخلاف ریاستی سرپرستی ٹی خارتس تقریر، نسل کشی نا خواست آک دینی  ءُ دروشم اس اختیار کرینو، منیر اکرم

اسلام آباد۔ 20 جون (اے پی پی) پاکستان جہانی برادری ءِ پارینے کہ بھارت اٹی مسلمان تا برخلاف ریاستی سرپرستی ٹی خارتس تقریر و اوفتا ’’نسل کشی‘‘ نا خواست آک بے کچ بڑزکو کہول اسکان سرمسنو ہنداسوب آن مسلمان تا برخلاف دا مہم ءِ چٹفنگ کن جہانی برادری کڑد ادا کے۔ اقوام متحدہ ٹی پاکستان نا آخبتی مندوب منیر اکرم خارتس تقریر آتا برخلاف ارٹ میکو جہانی دے انا رداٹ اڈ ہلوک دود اٹی تینا ریمارکس اٹی پارے کہ بھارت اٹی مسلمان تا برخلاف ریاستی سرپرستی ٹی خارتس تقریر و مسلم ’’نسل کشی‘‘ نا خواست آک دینی ءُ دروشم اس اختیار کرینو۔ اونسل کشی و خون نا توننگ نا ادارہ جنیو سائیڈ واچ نا سروک گریگوری سٹینٹن نا ساڑی آ وارننگ نا کنڈا چکار کرفے ہرابھارت ناغیرکانودی کوزہ ٹی جموں وکشمیر و آسام و بھارت نا ایلو بشخ آتیٹی نسل کشی نا گمان تا بارواٹی ءِ۔