راولپنڈی۔ 25مئی (اے پی پی) پاکستان اٹی امریکہ نا سفیر ڈیوڈ ہیل چارشنبے آ جنرل ہیڈ کوارٹرزنا دورہ ئِ کرے و چیف آف آرمی اسٹاف جنرل راحیل شریف تون اوڑدہی کرے۔ آئی ایس پی آر نا کنڈآن چارشنبے آ داڑے برجاءپریس ریلیز اسینا رداٹ اوڑدہی ٹی 22مئی 2016ءآ بلوچستان اٹی امریکی ڈرون جلہو آن گڈ ودی مروک آ حالیت آتیا ہیت و گپ مس ۔ آرمی چیف ڈرون جلہو آ گھڑتی نا درشانی ئِ کرسا پارے کہ وت واجہی نا خلاف ورزی نا دننگا گام گیج آک ہڑتوم آملک آتا نیام اٹ تعلقداری تیکن نسخان دہ و علاقائی سوگوی کن جاری امن عمل کن منفی زئم آتا حامل ئُ۔ چیف آف آرمی اسٹاف پارے کہ دہشت گردی نا برخلاف جنگ اٹی پاکستان نا کوشست، سرسہبی و قربانیک بے مثال ئُ۔
