اسلام آباد۔24مئی (اے پی پی) بنجائی وزیر اطلاعات و نشریات و قومی میرات سینیٹر پرویز رشید پارینے کہ چائنا پاکستان اکنامک کوریڈور ڈٹ شون و شونہالی نا راہداری ثابت مریک، پاکستان گوادر نا شون اتون اوار اوار ڈیہہ ٹی ایلو بندرگاہ تا اڈتننگ نا ہم خیرمقدم ئِ کیک۔ پاک چین تعلقداری اِرا ملک آتا الس اف، اسہ ارب خلقت آتا تعلقداری ئِ۔ ننا سنگتی مچ آ دیہہ و دنیا کن فائدہ مند ئِ، اقتصادی کوریڈور ڈیہہ ٹی امن و شونہالی نا بھلو ذریعہ اس مریک۔ دا کوریڈور آ چلینگوک آ قافلہ ایلو ملک آتے فتح کننگ کن مفک بلکن ڈیہہ نا خلقت آتے تعلیم و جان جوڑی تون اوار بنداوی زند انا گرج آتے فراوان کننگ کن مریک و امن نا دا شاہراہ ڈیہہ ٹی شونہالی نا بھرم آتے اتیک۔ بنجائی وزیر سے شنبے آ داڑے پاکستان براڈ کاسٹنگ کارپوریشن (پی بی سی ) ٹی پاکستان و چین ناسفارتی تعلقداری نا 65می سالگرہ نا وخت آ وزارت اطلاعات و نشریات و قومی میرات نا کنڈآن سیمینار ”پاکستان و چین آہنی ایلم“ آن تران کرسا پارے کہ اکنامک کوریڈور ڈٹ آن خلقت آتے کن روزگار نا وارخواہی ودی مریک ، شون نا چشمہ غاک جاری مریرہ ہراڑآن انسانیت ئِ فائدہ مریک۔ اوپارے کہ نن تینا چناتے گچین آخبت ایتنہ، ڈیہہ آن نیزگاری و جہالت چٹک۔ اوپارے کہ چین و پاکستان نا کروڑآ خلقت آتا اسہ ایلوتون کمک مریک۔ نن اسہ ایلو نا است آتے کٹینہ۔ اوپارے کہ پاکستان و چین ملک آتون دشمنی تخپسہ بلکن غٹ اتون امن و سنگتی خوارہ۔ مسکوہی 65سال آتیٹی داخلی و خارجی تبدیلی تا باوجود ہڑتوم آ ملک آتا تعلقداری تیٹی سوگوی بس و دا ہڑتوم آ ملک آتا نیام اٹ سنگتی و الس نا است خواہی تا درشانی ئِ۔ اوپارے کہ سیاسی وابستگی، پیشہ یا نسل آن قطع نظر پاکستانی تیٹی پورو اتفاق رائے ئِ کہ چین ننا پرخلوص سنگت و اسٹریٹجک پارٹنر ئِ۔ اوپارے کہ ملک آتا نیام اٹ تعلقداری عمومی وڑاٹ قومی مفادات آتیا مبنی تصور مریک و پاکستان و چین نا نیام اٹ تعلقداری دنیا نا ملک آتے کن مفاہمت ، تین پہ تینی مفاد و السی کہول آ رابطہ غاتا مثال ئِ۔ اوپارے کہ پاک چین تعلقداری صرف ہڑتوم آ ملک آتا الس نا تعلقداری اف بلکن دا اسہ ارب آن زیات خلقت آتا تعلقداری ئِ۔ ننا سنگتی نہ صرف ہڑتوم آ ملک آتا الس کن مفید ئِ بلکن مچ آ ڈیہہ و دنیا کن ہم فائدہ مند ئِ ہراڑآن دنیا ٹی امن و شونہالی ئِ مون آ دننگانے و داسا چائنہ پاکستان اکنامک کوریڈور و شون شونہالی نا رہداری ثابت مریک۔ بنجائی وزیر پارے کہ ڈیہہ ٹی بندرگاہ و شاہرات آتا جوڑ جاڑ آن الس اسہ ایلو ناخڑک بریرہ ،است آتیٹی مابت ودی مریک۔
