اسلام آباد۔ 24مئی (اے پی پی) صدر مملکت ممنون حسین پارینے کہ میوہ غاتا برآمدات آتے ودفنگ کن بڑزکو معیار نا میوہ غاتا پیداوار المی ئِ۔ اوداہیت ئِ سے شنبے آ ایوان صدر اٹی چیئرمین پاکستان فروٹ اینڈ ویجیٹیبل ایکسپورٹر ، امپورٹرز اینڈ مرچنٹ ایسوسی ایشن وحید احمد نا سروکی ٹی ڈل اتون اوڑدہی نا وخت آ پارے۔ صدر مملکت پارے کہ ایکسپورٹرایسوسی ایشن بنجائی و صوبائی حکومت آتون تینا رابطہ غاتے ٹی ترندی اتے تانکہ درآمدات و برآمدات آتا کسر اٹی بروک آ مشکلات آتا سدباب مننگ کے۔ صدر مملکت پارے کہ میوہ و سوزی تے رکھوک جوڑ کننگ کن پلانٹ پروٹیکشن نا چرجوئی ٹی غٹ اسٹیک ہولڈرز مناسب صلاہ ایتر تانکہ اوفتیا عملدرآمد ئِ باوری جوڑ کننگ مرے۔ صدر ڈل ئِ باوری ترفے کہ ایکسپورٹر آتا ویل آتا ایسری کن حکومت ہروڑنا کمک کننگ کن تیار ئِ۔ اوپارے کہ پوریاگر خواجہ غاک فروٹ سیکٹر اٹی کاریم کروک آ غیر تربیت یافتہ بندغ آتا تربیت نا بست وبند ئِ کیر تانکہ میوہ غاتا بین الاقوامی معیار نا رداٹ پیکنگ و رکھوک کرسا برآمد کننگ مرے۔ صدر مملکت پارے کہ حکومت کشاری بشخ انا شون اکن تینا کڑد ئِ ادا کننگ ئِ و دا چرجوئی ٹی پوریا گر برادری نا صلاح غاک حکومت نا پالیسی تیٹی پین گچینی اتنگ اٹی کمکار ثابت مریرہ۔
