اسلام آباد۔ 24مئی (اے پی پی) صدر مملکت ممنون حسین الس ئِ اوفتا درگہ غا دمدستی انصاف نا تننگ آ بنجائی محتسب آفس نا ستائِ کرسا پارینے کہ محتسب ئِ کیس آتے چٹفسا غاو تروک آئِ ریلیف تننگ تون اوار اوار بد انتظامی ٹی اوار کارندہ غاتا برخلاف انضباطی کارروائی ہم تجویز کروئی مرے۔ اوداہیت ئِ بنجائی محتسب نا ڈل اتون ہیت وگپ کرسا پارے ہرا سلمان فاروقی نا سروکی ٹی سے شنبے آ ایوان صدرا ٹی اوڑتون اوڑدہی کریر۔ بنجائی ٹیکس محتسب عبدالرﺅف چوہدری ہم اوڑدہی ٹی ساڑی ئس۔ صدر پارے کہ کانود نا مسخت الس کن مشکلات ودی کننگ نا اف بلکن اوفتا کمک و اوفتے آسراتی تننگ نا مریک ۔ صدر اومیت ظاہرکرے کہ کیہی سرکاری ادارہ غاتا کاریم تا جاچ ئِ ہلنگ کن اڈ تروک آ بنجائی محتسب نا ہفت کمیٹی السئِ گچین خذمت آتا فراوانی کن حکومت ئِ گچین و قابل عمل سفارشات پیش کیرہ۔ بنجائی محتسب صدر ئِ پنشن اصلاحات ، جیل اصلاحات و تھانہ اصلاحات آتا بارواٹی رپورٹس پیش کریر۔ صدر مملکت ممنون حسین پارے کہ ریٹائرڈ سرکاری ملازم آتا پنشن نا ویل آتا ایسری کن چائندارآتا کنڈآن جامع رپورٹ نا تیاری اسہ خوش آئند گام اسے اواومیت ظاہر کرے کہ جیل و تھانہ اصلاحات آتا بارواٹی رپورٹس آتا تیاری دا بشخ آتیٹی کارکڑد ئِ گچین جوڑ کننگ اٹی کمکار مریرہ۔ صدر مملکت بنجائی محتسب تون پارے کہ او خلقت آتے مفت و دمدستی انصاف نا تننگ کن کاریم ئِ برجا تخر۔ بنجائی محتسب صدر مملکت ئِ بنجائی محتسب نا کیہی کمیٹی تا کاریم تا بارواٹی معلومدار کرے و بنجائی محتسب سیکرٹریٹ نا کنڈآن بناءکروک آ غاو آتا دمدستی ازالہ نا پروگرام نا بارواٹی سرجم بریفنگ ہم تس۔
