کابل۔ 24مئی (اے پی پی) سویلی اوغانستان اٹی مسافر بس انا خڑک زورداردھماکہ نا نتیجہ ٹی 4بندغ تپاخت و 5پین ٹھپی مسنو، اوغان کمامدارآک ہلمند نا ضلع مرجاٹی طالبان تا صوبائی شیڈو گورنر ئِ فضائی کارروائی ٹی خلنگ نا داوا کرینو، اوغانستان نا سیکورٹی فورسز آک ملک انا کیہی بشخ آتیٹی کارروائی نا وخت 53عسکریت پسند آتے تپاخت کننگ نا داوا کرینو ، کارروائی تیٹی 10فوجی کارندہ غاتا تپاخت مننگ نا تصدیق کننگانے۔ اوغان میڈیا نا رداٹ قندہار نا صوبائی گورنر نا ترجمان شمیم خپلواک پارے کہ تدوک آ دے قندہار نا ضلع شاہ ولی کوٹ اٹی اسہ مسافر منی بس اسینا خڑک زورداردھماکہ مس ہرانا نتیجہ ٹی 4بندغ تپاخت و 5پین ٹھپی مسنو۔ ٹھپی مروک آتے ہسپتال آ گدریفنگانے۔ داوخت اسکان ہچ ئُ رڑیا تنظیم اس دا جلہو نا زمہ واری ئِ امنا کتہ نے۔ ہلمند نا ضلع مرجاٹی طالبان تا صوبائی شیڈو گورنر ئِ اسہ فضائی کارروائی سے ٹی خلنگ نا داوا کننگانے۔ صوبائی سیکرٹری چیف نا رداٹ ملامنان اسہ فضائی کارروائی سیٹی ٹھپی مسوسس و تدوک آدے ٹھپ آتا وس ئِ اتنگ کتو دنیا ئِ اِلا۔ اوپارے کہ ملامنان ئِ آپریشن خنجر نا وخت آ نشانہ جوڑ کننگا۔ طالبان تا کنڈآن داوخت اسکان ہچ ئُ بیان اس مون آ بتہ نے۔ کابل اٹی اوغان وزارت دفاع نا کنڈآن برجامروک آ اسہ بیان اسیٹی پاننگانے کہ ملک انا کیہی بشخ آتیٹی کارروائی تا وخت 53عسکریت پسند تپاخت و 10فوجی کارندہ تپاخت کرینو۔ بیان نا رداٹ دا کارروائیک زیات تر دے ٹکی و سویلی اوغانستان نا صوبہ غاتیٹی کننگار۔
