کوئٹہ ۔ 24مئی (اے پی پی) کوئٹہ ایوان صنعت و واپار نا صدر جمال خان ترہ کئی پاکستان ایران جوائنٹ چیمبر آف کامرس اینڈ انڈسٹری نا اڈ ہلنگ نا خیرمقدم ئِ کرسا پارے کہ دا گام آن ہڑتوم آ برادر ہمسایہ ملک آتا نیام اٹ اڈ ہلوک تاریخی ، دودوربیدہ ، سیاسی و اقتصادی تعلقداری تیٹی پین گچینی بریک۔ سے شنبے آ”اے پی پی“ تون ہیت و گپ کرسا کوئٹہ ایوان صنعت و واپار نا صدر جمال خان ترہ کئی پارے کہ ایران آ خلوک پابندی تا چٹفنگ آن پد ننے ایران تون ہر بشخ اٹی تعلقداری تا گچینی کن تینا پالیسی تا پوسکنی آن جاچ ئِ ہلسا پین گچین جوڑ کروئی مریک۔ اوپارے کہ پاک چین اقتصادی راہداری ڈٹ و گوادر پورٹ انا فعالیت نا سوب بلوچستان نا اہمیت پین ودانے۔ بنجائی وزیر واپار انجینئر خرم دستگیر صوبہ نا پوریاگر تا ویل آتیٹی بھاز است خواہی ہلنگ ئِ ہراکہ خوش آئند گام اسے۔ جمال خان ترہ کئی پارے کہ کوئٹہ کراچی و فاٹا نا حالیت آک گچین نا کنڈا روان ئُ و مسکوہی نا روایتی امن بحال مسنے ہرانا درملکی زرکار آتے فائدہ ہرفسا زرکاری کروئی مرے۔ اوپارے کہ بلوچستان معدنیات آن مالامال صوبہ اسے حکومت تعلیم و کسبی تربیت نا بشخ آتیا توجوہ تخر تو پاک چین اقتصادی راہداری ڈٹ آن صوبہ ٹی شونہالی نا پوسکن آ دور انا بناءو ورناتے روزگار نا موقع ملنگ تون اوار اکنامک زونز انا اڈ ہلنگ آن معاشی سوگوی بریک۔
