اسلام آباد۔ 23مئی ( اے پی پی) پاکستان ئَ چین ئِ سفیر سن وی ڈانگ ئَ گشتگ انت کہ پاکستانئُُ چین معاشی سفارت کاری ئِ رشگ ئَ ہم لوپ انت۔ دوئیں ملک یکجا وتی اُلسئِ شر تری ئِ ھاتر ئَ کار کنگ ئَ انت۔ پاکستانئُُ چین ئِ دوستی ” آئرن براتی“ ئِ مثال ئِ وڑ ئَ سوگو بوتگ انتئُُ دوئیں ملک آنی اُلس بلا تفریق اے دوستی ئِ حمایت کنگ ئَ انت۔ اے ھیال آنید رشانی آئی ئَ دو شمبے ئَ پاک چین سفارتی سیادی ئِ 65می سالروچ ئِ موہ ئَ دیوان ئَ تران کنگ ئَ کرتگ۔ چینی سفیرئَ گشتگ کہ دوئیں ملک آںہر وھدئَ یک دومی ئِ مفاد ئِ تحفظ کرتگ انت۔ پاک چین اقتصادی راہداری ئَ دوئیں ملک آنی دوستی برزی ئَ سر کرت انت۔ اے منصوبہ محض پائلٹ منصوبہ انت۔ مارا یکجا دِگہ بازیں منصوبہ بندات کنگی انت۔ آئی ئَ گشتگ کہ پاک چین اقتصادی راہداری منصوبہ نوں عمل کنگ ئِ وھدئَ انت۔ توانائی، موٹرویز ئُُ گوادر پورٹ ئِ سرجمی زوت بیت۔ چینی سفیر ئَ گشتگ کہ پاکستان ئُُ چین یک دومی ئِ گوں ھوار ہر مشکلیں وھد ئَ اوشتاتگ انت۔ آئی ئَ گشتگ کہ چین ئِ صدر ئَ پاکستانئِ تر ئُُ تاب کرتگ ات ئُُ آئی ئِ اے تر ئُُ تاب دوئیں ملکانی نیام ئَ سیادی ئَ دِگہ دراجی رستگ انت۔ آئی ئَ گشتگ کہ پاک چین اقتصادی راہداری ئِ سرا کار تیزیئَ برجاہ انت، چین پاکستان اقتصادی راہداری الما چینئُُ پاکستان ئِ نیام ئَ کمک زیات کنگ ئِ حکمت عملی ئِ نام نہ انت بلکں اے درستیں خطہ ئِ دیمروی ئُُ وشحالی ئِ ھاتر ئَ ھاسیں کرد پیش داریت۔ اقتصادی راہداری ئَ نہ الما دوئیں ملک بلکں خطہ ئِ دومی ملک آں ہم پائدگ بہ رسیت۔ چینی سفیر ئَ گشتگ کہ اقتصادی راہداری دوئیں ملک آنی نیام ئَ ھاسیں شعبہ ئَ کمک ئِ سرا گام گیج صوبہ آنی سرجمیں پیکج انت آئی ئَ اطلاعات نیٹ ورک ، بنیاتی ڈھانچہ ، توانائی، صنعت ، کشتئُُ کشار ، سیل ئُُ سواد ئُُ لہتیں دومی شعبہ ھوار انت۔
