نیویارک۔ 25 جنوری (اے پی پی) پاکستان اوغانستان اٹی سیاسی سوگوی و انسانی حق ءِ پک کننگ نا پوسکن آ حکمت عملی اس تینا کننگ نا گرج آ زور شاغسا پارینے کہ اوغانستان کن جہانی امداد ءِ طالبان تا کماشی ٹی اوغان حکومت آ دباؤ ودفنگ تون منسلک کننگ نا متکن آ حکمت عملی سرسہب مننگ کتو۔ اقوام متحدہ ٹی پاکستان نا آخبتی مندوب منیر اکرم بی بی سی ریڈیو و بی بی ٹی وی لائیو ءِ انٹرویو ٹی پارے کہ اوغان حکومت اٹی سیاسی سوگوی و انسانی حق انا بابت گپ وتران و اوفتے قائل کننگ نا اسہ پوسکن ءُ حکمت عملی اس پٹنگ نا گرج ءِ تانکہ مشکل آتا گواچی اوغان شاری مخلوق کن جہانی مخ تفی نا چرجوئی ءِ برجاتخنگ مرے۔ اوپارے کہ طالبان تیا زور شاغنگ کن جہانی امداد آن فائدہ ہرفنگ نا ہرا حکمت عملی ءِ اختیار کننگانے ، او سرسہب مننگ کتنے ہنداخاطران ننے اوغان الس کن جہانی مخ تفی ءِ برجاتخنگ کن طالبان تا کماشی ٹی حکومت تون رابطہ کننگ و اوفتے قائل کننگ نا پوسکن آ حکمت عملی اس پٹنگ نا گرج ءِ۔ اسہ سوج اسے نا ورندی ٹی اوپارے کہ اوغان حکوتم نا گڑاس فیصلہ جہانی برادری کن ناقابل قبول ءُ، پاکستان ہمسایہ ملک مننگ نا حیثیت اٹ اوغانستان تون رہینگوئی ءِ و اوغانستان اٹی انتس کہ مریک اونا اثر پاکستان آ تمک۔ اوپارے کہ پاکستانی مندوب منیر اکرم پارے کہ نن طالبان تا کماشی ٹی اوغان حکومت تون رابطہ غاتے برجاتخپننگ ءِ سگنگ کپنہ، طالبان اسہ حقیقت اسے ، مچ آ ملک اوفتا کنٹرول اٹی ءِ و ہنداخاطران ننے اوفتے تون رابطہ ٹی رہینگوئی مریک۔ اوپارے کہ اگہ اوغانستان کن جہانی امداد یا انسانی امداد ءِ بند کننگا تو ننے اونا نتیجہ ٹی قحط و بین ، پناہ گزین تا پیش تمنگ، بھلا نزوری و دہشت گردی ٹی ودکی نا حالیت اٹ بھلا حالیت آتون مون تروئی تمک ہنداخاطران ننے اوغانستان اٹی اقتصادی بحالی کن رابطہ، انسانی امداد و کمکاری ءِ برجاتخنگےانتئے کہ ہندا اوغان الس کن نیزگاری واوفتے مون تروک سنگین حالیت آتیان کشنگ نا کسر ءِ ، انتئے کہ اوغان زرگزران بھس مسنے ہرا 75 درسد درملکی امداد آ سیبو ءِ۔
