نیویارک۔ 17 جنوری (اے پی پی ) پاکستان پاک اوغان سیم آ ودوک آ عسکریت پسندی آ گڑتی نا درشانی ءِ کرسا خبڑدار کرینے کہ اوغانستان نا زرگزرانی حالیت آتا گچین مننگ اسکان عسکریت پسند ٹولی داعش و آئی ایس آئی ایل نا جلہو آتیٹی خلنگوک آ طالبان تا کچ اٹی ودکی مننگ کیک۔ اقوام متحدہ ٹی پاکستان نا آخبتی مندوب منیر اکرم امریکی میگزین نیوزویک ءِ انٹرویو ٹی خصوصی وڑاٹ تحریک طالبان پاکستان (ٹی ٹی پی) و بلوچستان لبریشن آرمی (بی ایل اے)، علاقائی داعش خراسان شاخ، ہرادے آئی ایس آئی ایس نا یا آئی ایس آئی ایل نا ذکر ءِ کرے ہرافک پاکستانی کارندہ و شاری تے شست کریر۔ اوپارے کہ گڑاس وخت دا ٹولیک اوار مرسا ہم پاکستان نا فائدہ غاتا برخلاف کاریم کیرہ۔ ننے داڑتون مون تروئی مریک و نن داخلی وڑاٹ دانا برخلاف سنبرینگوک اُن دُن کہ نن مستین اٹ دانا برخلاف مقابلہ کرینن۔ اوخبڑدار کرے کہ طالبان تا کماشی ٹی اوغان حکومت ءِ دا ہیت ءِ پہہ کننگ نا کوشست اٹی کہ دا غٹ ٹولی تا مقابلہ ءِ کننگ اونا دمدستی فائدہ ٹی ، پوسکن ءُ چیلنج مون آ بسنے۔ پاکستانی مندوب پارے کہ پاکستان ءِ پاک اوغان سیم آ ودوک آ عسکریت پسندی آ گڑتی ءِ ۔ اوغانستان اٹی داوخت آہندن ءُ حالیت اسے ہراڑے اوغان حکومت داعش خراسان نا مقابلہ ءِ کننگ اٹی ءِ ننے اوغان حکومت ءِ ایلو غٹ دہشت گرد تحریک آتون مون تننگ کن قائل کننگ نا گرج ءِ۔ نن حالیت آتے پہہ مرینہ ولے ننے اوفتا برخلاف اسہ گچین ءُ حکمت عملی اس تینا کروئی مریک۔ اوپارے کہ ٹی ٹی پی و بی ایل اے تون اوار ایلو ٹولی کون آ ایسٹ ترکستان اسلامک موومنٹ (ای ٹی آئی ایم) ہرا ایغور نسل انا عسکریت پسند آتیا تالان ءِ و ازبک نسل نا عسکریت پسند آتیا تالان اسلامک موومنٹ آف ازبکستان (آئی ایم یو) نا ہم مقابلہ ءِ کننگ نا گرج ءِ ولے اوغان حکومت نا کنڈان داوڑنا کوشست آک ہمووخت اسکان کاریمی مننگ کپسہ ہراتم اسکان اوغانستان نا زرگزرانی حالیت آک گچین مفسہ۔ پاکستانی مندوب پیدوار کرے کہ پیشن آن مالی کمک ملنگ نا سوب آن داعش نا دُوک سوگو مننگ ءُ۔ اگہ اوغانستان نا زرگزرانی حالیت گچین متو و طالبان تے مالی وسیلہ دوئی مننگ کتو تو اونا گڑاس دھڑ عسکریت پسند ٹولی داعش و آئی ایس آئی ایل نا شست مننگ کیرہ ہرا اسہ فریشانی نا حالیت اس مریک۔
