اقوام متحدہ۔ 06 جنوری (اے پی پی) اقوام متحدہ نا شونداری پروگرام (یو این ڈی پی ) پارینے کہ پاکستان اٹی تدوک آ سال نوکاپ نا بھسکاری تیان 3 کروڑ 30 لکھ بندغ زہمی مسنو ہرانا سوب آن پین 90 لکھ بندغ آتا نیزگار مننگ نا گڑتی ءِ۔ پاکستان اٹی اقوام متحدہ نا شونداری پروگرام نا ریزیڈنٹ ریپریز نٹیٹوکیوٹ اسٹبی پارینے کہ ننا کساس ءِ کہ پاکستان اٹی تدوک آ بشام اٹی بروک آ نوکاپ نا سوب آن پین کم و ود 90 لکھ بندغ نیزگار مننگ کیرہ۔ چاگڑدی بدلی تا اثر و نوکاپ نا بھسکاری تتون مون تننگ کن بروک آ ہفتہ جنیوا ٹی اسہ دے ئی انٹرنیشنل کانفرنس آن کلائمیٹ ریزیلیئنٹ پاکستان کانفرنس اس اڈتننگک ہراٹی چندی ملک آتا سروک و کیہی ملک آتا بڑزکو مندوبین آک بشخ ہلیرہ۔ او داوخت آ پارے کہ دُن تو پاکستان اٹی داوڑنا نوکاپ مہالو بتنے ولے داوڑنا چاگڑدی بدلی تیان زہمی مروک آ ایلو ملک آک ہم مننگ کیرہ ۔ اوپارے کہ نوکاپ نا سوب آن فصل آتے بھاز نسخان رسینگا و بروک آسیزن کن فصل کاشت مننگ کتو ہرانا سوب کشاری اجناس و غذائی گڑاتا نہاد آتیٹی ودکی مننگ آن نئے بیرہ غذائی بے رکھی ٹی ودکی مس بلکن نیزگاری آن شیف زند ءِ تیرکروک آ بندغ آتا کچ 70 لکھ آن ودسا اسہ کروڑ 46 لکھ اسکان سرمننگ کیک۔ جنیوا ٹی اقوام متحدہ کن پاکستان نا آخبتی نمائندہ خلیل ہاشمی پارے کہ نوکاپ آن زہمی مروک آ نوکاپ نا سوب 3 کروڑ 30 لکھ بندغ زہمی مسر ہرافتیان کم و ود 80 لکھ بندغ داتم اسکان بے اُرا ءُ انتئے کہ گڑاس علاقہ غاتیٹی نوکاپ نا دیر داسہ ہم کم متنے۔ اوپارےے کہ داوخت آ زہمی تا غٹ آن دمدستی گرج ہنکین، کشت وکشار و ذریعہ معاش ءِ ہرا دمدستی انسانی گرج ءِ۔ اوجنیوا ٹی دوشنبےنادے (9 جنوری ) آ مروک آ بڑزکو کہولی کانفرنس نا وخت آ پارے کہ کانفرنس نا اسیجائی مہمانداری پاکستان نا وزیراعظم شہباز شریف و اقوام متحدہ نا سیکرٹری جنرل انتونیوگوتریس ئسک کیرہ۔ کانفرنس نا مسخت سرکاری و نجی بشخ آتا راہشون آتے یکجا کننگ و پاکستان اٹی تدوک آ سال بھسکار نوکاپ آ ن زہمی مروک آ علاقہ غاتیکن مالی و جہانی کمک فراوان کننگ و بھس مروک انفراسٹرکچر نا بحالی و پوسکن تفنگ ءِ۔ پاکستان نا وزارت خارجہ ٹی اقوام متحدہ نا ڈویژن نا سروک سید حیدر شاہ اسلام آبادآن زوم انا کمک اٹ ہیت کرسا پارے کہ پاکستان ءِ چاگڑدی بدلی تا اثر و نوکاپ نا بھسکاری تتون مون تننگ، بحالی و پوسکن تفنگ اٹ کمک کن 16 ارب ڈالر آن زیات نا امداد نا گرج ءِ۔ نوکاپ آن زہمی علاقہ غاتا بحالی و پوسکن تفنگ بیرہ اسہ سال انا ڈٹ اس اف۔ بحالی و پوسکن تفنگ کن گرج آتا اسٹریٹجک بحالی نا پین 4 ہدف آتیٹی درجہ بندی ءِ کننگا ہراٹی حکومت نا صلاحیت سازی، جوان پوسکن تفنگ، صنفی ویل و معاش اوار ءِ۔ کیوٹ اسٹبی پارے کہ پاکستان اٹی نوکاپ نا سوب آن 20 لکھ اُرا13 ہزار کلومیٹر آن زیات سڑک، 3 ہزار کلومیٹر آن زیات ریلوائی ٹریک، 439 پول بھس مسر و نسخان رسینگا، 40 لکھ ایکڑ کشاری بھس مس و نسخان رسینگا وخت اس کہ 10 لکھ آن زیات ساہدارک کسکر۔ اوپارے کہ کیہی علاقہ غاتیٹی داسہ ہم نوکاپی دیر سلوک ءِ ہرانا سوب آن بھاز انگا مخلوق ہڑدے ئی زند انا کنڈا ہِننگ کپسہ ہنداسوب ءِ کہ او انسانی امداد آ سیبو تخرہ۔
