اسلام آباد۔ 06 جنوری (اے پی پی) بنجائی وزیر حوالکاری و شینکاری مریم اورنگزیب پارینے کہ پوسکن آ ٹیکنالوجی نا دور اٹی پاکستان ٹیلی ویژن نا غٹ آن بھلا ورچوئل اسٹوڈیو ٹیکنالوجی نا گیپ ءِ مر کننگ اٹ کمکار جوڑ مریک، پاکستان ٹیلی ویژن تون غٹ میرات ساڑی ءِ بیرہ اوفتے گچین وڑاٹ کاریم اٹ اتنگ نا گرج ءِ۔ او جمعہ نادے آ بنجائی وزیر بجلی انجینئر خرم دستگیر خان تون اوار پاکستانی ٹیلی ویژن نا ورچوئل اسٹوڈیو نا بناءِ کننگ نا وخت آ تران کریکہ۔ داوخت آ سیکرٹری حوالکاری شاہیرہ شاہد، ایم ڈی پی ٹی وی سہیل علی خان و چیئرمین پیمرا سلیم بیگ ئسک ہم ساڑی ئسر۔ دود آن تران کرسا بنجائی وزیر حوالکاری مریم اورنگزیب پارے کہ اینو پی ٹی وی نا عملہ و انتظامیہ نا کوشست آتیان پی ٹی وی ٹی آئی ٹی تخوک سلوشن آک کاریم اٹ اتنگ انگ ءُ ہرا پوسکن آ دور انا خواست ءِ۔ اوپارے کہ ورچوئل اسٹوڈیو نا جوڑ کننگ پاکستان ٹیلی ویژن نا اسہ پین مزل نا نشان اسے ،اودے پاکستان نا غٹ آن بھلا ورچوئل اسٹوڈیو مننگ نا شرف دوئی ءِ۔ پی ٹی وی نیوز درست خبر آتون داسہ پوسکن وڑاٹ کاریم کیک۔ ورچوئل اسٹوڈیو نا بابت بشخ ہلوک آتے پاننگاکہ پاکستان ٹیلی ویژن نا اسٹیٹ آف دی آرٹ ورچوئل سیٹ قومی علاقائی و جہانی خبرآتون اوار اوار موسم و گوازی تا خبر و حالات حاضرہ نا پرگرام تے ہم پوسکن وڑاٹ الس نا مون آ پیش کیک۔ پاکستان ٹیلی ویژن تینا 58 سال انا سفر اٹی شونداری نا چندی مزل آتے طے کرینے۔ پاکستان ٹیلی ویژن نیوز تینا غٹ آن بھلا ورچوئل اسٹوڈیو تون داسہ الس ءِ پوسکن وڑاٹ خبر، جاچ و پاکستان نا حقی نکتہ نظر آن باخبر تخک۔ ورچوئل اسٹوڈیو نا جوڑ مننگ آن قومی، علاقائی خبر، سیاست، دودوربیدگ، تعلیم، حالات حاضرہ و جہانی امور نا بابت پی ٹی وی نیوز نا ہروک آک پوسکن وڑاٹ معلومدار مننگ کیرہ۔ اسٹوڈیو تا کمک اٹ موسم نا خبر آتون اوار اوار گوازی تا پڑ اٹی ہم ہروک آتے معلومدار تخنگک۔ گچین آڈیو، ہائی ڈیفینیشن ویڈیو، زیبدار گرافکس و پی ٹی وی نیوز نا سکرین نا بشخ اس مریرہ ۔
