اقوام متحدہ۔ 06 جنوری (اے پی پی) اقوام متحدہ تینا اسہ رپورٹ اسے ٹی پارینے کہ بھارت لائن آف کنٹرول نا چاروکی کن تعینات جہانی ادارہ نا فوجی مبصر ٹولی نا کاریم اٹی اڑاند شاغنگ اٹی ءِ ہراڑان ٹولی نا امن نا کوشست آتے نسخان رسینگ انگ ءِ۔ کشمیر میڈیا سروس نا رداٹ اقوام متحدہ نا فوجی مبصر ٹولی تینا رپورٹ اٹی پارینے کہ بھارت ٹولی ءِ کنٹرول لائن و ورکنگ بائونڈری آ آجو ہن و بر نا موکل ملپننگ ءِ۔ رپورٹ اٹی پاننگانے کہ فوجی مبصر و جہانی عملہ ءِ مقبوضہ جموں وکشمیر نا سفر کن ویزہ دوئی کننگ اٹ بھلو ہرے اسے تون مون تروئی تمک۔ رپورٹ اٹی پاننگانے کہ بھارت ٹولی ءِ بیرہ 11 فیلڈ سٹیشن اس جوڑ کننگ آ بیوس کرے۔ رپورٹ اٹی پاننگانے کہ بھارت نا کنڈآن عائد کروک آ دا پابندی تا سوب آن گروپ نا آپریشنل خڑچ آک ودانو نیز بھارت مارچ 2020اٹی جموں و سیالکوٹ اٹی ورکنگ بائونڈری کراسنگ پوائنٹ ءِ بند کریسس، ہراڑان مبصرٹولی ءِ جموں ٹی تینا فیلڈ اسٹیشن تسکان سرمننگ کن واگھا بارڈر آن زیات مرغن کسر ءِ کاریم اٹ اتوئی تما۔ رپورٹ اٹی پاننگانے کہ بھارت فیلڈ اسٹیشن تیٹی تینا فرض ءِ سرتروک آ فوجی مبصر آتے لاجسٹک و راشن نا بلامعاوضہ آسراتی تے ہم بند کرینے و 2013 آن او ہنکین و خور انا راشن نا آسراتی تا عوض ہر تُو جہانی ادارہ غاتیان لکھ آ روپئی دوئی کرینے۔
