جہانی برادری مقبوضہ جموں و کشمیر نا الس ءِ اقوام متحدہ سلامتی کونسل نا قرارداد آتا رداٹ حق خودارادیت نا دوئی کننگ ءِ پک کے، وزیرخارجہ بلاول بھٹو زرداری

اسلام آباد۔ 05 جنوری (اے پی پی) وزیرخارجہ بلاول بھٹو زرداری جموں وکشمیر نا الس نا حق خودارادیت کن مخ تفی نا عزم انا درشانی ءِ کرسا دا ہیت آ زور شاغانے کہ جہانی برادری خاص وڑاٹ اقوام متحدہ تینا قول آتیا عمل کے و ہندن ءُ گام گیج کے ہراڑان جموں وکشمیر نا مخلوق ءِ اقوام متحدہ نا سلامتی کونسل نا قرارداد آتا رداٹ حق خودارادیت نا دوئی کننگ ءِ پک کننگے۔ پنچ شنبےنادے آ یوم حق خودارادیت ناوخت آ تینا کلہو اٹی اوپارے کہ اینو نادے 1949 اٹی اقوام متحدہ نا کمیشن بھارت و پاکستان (یواین سی آئی پی) امنائی وڑاٹ اقوام متحدہ نا کنڈآن آجو و بے کنڈہلوک استصواب رائے نا کمک اٹ کشمیری الس نا حق خودارادیت نا مخ تفی نا قرارداد ءِ منظور کریسس۔ اوپارے کہ حق خودارادیت جہانی کانود نا اسہ بنداوی اصول ءِ ہرادے جہانی انسانی حق انا دستاویز آتیٹی برقرار تخنگانے، اقوام متحدہ نا جنرل اسمبلی حق خودارادیت نا بابت تینا سالانہ قرارداداٹی دادے پک کرینے۔ وزیرخارجہ پارے کہ دادے جہانی برادری خاص وڑاٹ اقوام متحدہ ءِ جموں وکشمیر نا عزم انا شرف ناگرج ءِ تالان کیک۔ اوپارے کہ بھارت نا غیرکانودی کوزہ ٹی جموںو کشمیر آ بھارتی کوزہ نا تدوک آ75 سال کشمیری الس آ جور انا اسہ است ہسون داستان اسے۔ اوپارے کہ بھارت مقبوضہ جموں و کشمیر اٹی دہشت  نا بازار ءِ گرم کرینے و دامظلوم مخلوق ءِ حق خودارادیت نا تینا ناقابل تنسیخ حق انا کاریم اٹ اتنگ و عزت نا زند اس تیر کننگ نا حق تننگ آن انکاری ءِ، بھارت 5 اگست 2019 آ غیرکانودی و اسہ کنڈی گام گیج کرینے، بھارت کشمیری تے تینا گل زمین اٹی اسہ بے اختیار اقلیت اٹ بدل کننگ کن مقبوضہ دامان اٹی آبادیاتی و سیاسی بدلی کننگ ءِ۔ بلاول بھٹو پارے کہ داوخت ءِ کہ جہانی برادری خاص وڑاٹ اقوام متحدہ تینا قول آتیا عمل کے و ہندن ءُ گام گیج کے ہراڑان جموں و کشمیر نا مخلوق ءِ اقوام متحدہ نا سلامتی کونسل نا قرارداد آتیٹی درج حق خودارادیت نا دوئی کننگ نا قابل کننگ مرے ، اودے انسانی حق انا خلاف ورزی تے دمدستی وڑاٹ توننگ ومقبوضہ جموں وکشمیر اٹی آبادیاتی پنجر ءِ بدل کننگ کن بھارت نا گام گیج آتے بدل کننگ آ ہم زور شاغنگے۔ اوپارے کہ پاکستان اقوام متحدہ نا سلامتی کونسل نا قرارداد آتا رداٹ آجو و بے کنڈہلوک استصواب رائے نا کمک اٹ کشمیری تا حق خودارادیت نا مخ تفی کن تینا کڑد ءِ ادا کننگ، کشمیری الس نا حق خودارادیت نا دوئی کننگ اسکان ننا پبی ، ثابت قدم اخلاقی ، سیاسی و سفارتی مخ تفی برجاسلک۔