’’انٹرنیشنل کانفرنس آن کلائمیٹ ریزیلینٹ پاکستان ‘‘ اٹی سٹریٹجک پالیسی و اولیتی دستاویز آ تالان ریزیلینٹ ، ریکوری، بحالی و پوسکن تفنگ نا فریم ورک اس پیش کیک، ترجمان دفترخارجہ نا ممتاز زہرہ بلوچ نا حوال

اسلام آباد۔ 05 جنوری (اے پی پی) دفترخارجہ نا ترجمان ممتاز زہرہ بلوچ پارینے کہ پاکستان جنیوا ٹی مروک آ ’’انٹرنیشنل کانفرنس آن کلائمیٹ ریزیلینٹ پاکستان‘‘ اٹی سٹریٹجک پالیسی و اولیتی دستاویز آ تالان ریزیلینٹ ، ریکوری، بحالی وپوسکن تفنگ نا فریم ورک (آرایف4) پیش کیک، بھارت نا پدریسہ پاکستان مخالف بیانیہ پاکستان نا گل زمین آ دہشت گردی ءِ تہو تننگ اٹ اونا ڈھیٹی اٹ اوار مننگ ءِ ڈکھنگ کپک، ایلوفتیا ہور ہرفنگ نا جاگہ غا بھارت ءِ تینٹ دہشت گردی، تخریب کاری و پاکستان نابرخلاف جاسوسی ٹی اوار مننگ ءِ بند کے۔ داخیال آتا درشانی ءِ او پنچ شنبےنا دے آ ہفتہ وار پریس حوال اٹی کرے۔ ترجمان دفترخارجہ پارے کہ پاکستان 9 جنوری آ جینواٹی مروک آ ’’انٹرنیشنل کانفرنس آن کلائمیٹ ریزیلینٹ پاکستان‘‘ اٹی سٹریٹجک پالیسی و اولیتی دستاویز  ریزیلینٹ ریکوری، بحالی و پوسکن تفنگ نا فریم ورک (آرایف۔4) اس پیش کیک، آرایف۔4 حکومت پاکستان نا اسہ اسٹریٹجک پالیسی و اولیتی دستاویز ءِ ہرا ساڑی آ بھسکار نوکاپ آن پد بحالی و پوسکن تفنگ کن ریزیلینٹ چاگڑد اس ودی کننگ اٹ راہشونی کیک، اوٹی داکان پد قدرتی آفت جاچ نا بنداو آ نتیجہ اخذ کننگانے، داٹی چار اسٹریٹجک مسخت آتا اردگرد بشخ آتیٹی ترتیب وار اولیت پیش کننگانے۔ اوپارے کہ آرایف۔ 4 دستاویز اٹی پالیسی فریم ورک، مالیاتی حکمت عملی و نفاذ و چاروکی نا وڑوڈول اس پیش کننگانے، داٹی شونداری شریدار آتا کمک اٹ  شفاف  و تین پہ تینی کمکاری اتون دانا نفاذ کن ادارہ جاتی بست وبند ہم اوار ءِ۔ اوپارے کہ وزیراعظم شہباز شریف و اقوام متحدہ نا سیکرٹری جنرل انتونیوگوتریس نا اسیجائی کماشی ٹی دا بڑزکو کہولی بنائی دیوان مریک ہراڑے چندی ملک آتا راہشونک اونا مخ تفی ٹی تران کیرہ۔ وزیراعظم محمد شہباز شریف کانفرنس اٹی تینا تران اٹی موسمیاتی ریزیلینٹ ، بحالی و پوسکن تفنگ کن پاکستان نا وژن نا خاکہ ءِ پیش کیک۔ اوپارے کہ دا کانفرنس پاکستان نا نوکاپ آن زہمی مخلوق کن جہانی برادری نا پدریسہ مخ تفی تا درشانی مریک۔ بھارتی وزیر خارجہ نا کنڈآن پاکستان آ سٹی و فضول دوبہ غاتا چرجوئی نا حوالہ ءِ ترسا اوپارے کہ دا بیان اسہ وار ولدا پاکستان ءِ بدنام کننگ و تنیا کننگ اٹ بے سہبی آ بھارت نا ودوک آ مایوسی نا عکاسی ءِ کیک، پاکستان تون بھارت نا گنوکی ناقابل فہم و مضحکہ خیز ءِ، بھارت نا پدریسہ پاکستان مخالف بیانیہ پاکستان نا گل زمین آ دہشت گردی ءِ تہو تننگ اٹ تینا ڈھیٹی اٹ اوار مننگ ءِ اودیم کننگ کپک و نئے دا بھارت نا غیرکانودی کوزہ ٹی جموں وکشمیر اٹی ریاستی سرپرستی ٹی مروک آ دہشت گردی نا حقیقت ءِ اودیم کننگ کیک۔ اوپارے کہ ایلوفتیا ہورہرفنگ نا جاگہ غا بھار ت تینٹ دہشت گردی، تخریب کاری و پاکستان نا برخلاف جاسوسی ٹی اوار مننگ ءِ بند کے۔ اوپارے کہ یکم جنوری آ پاکسان و بھارت جوہری تنصیب و تنصیب آتا لڑآتون اوار اوار اسہ ایلو نا تحویل اٹی بندی تا لڑتے اسہ ایلو ءِ تسر۔ 2022 اٹی بھارت نا غیرکانودی کوزہ ٹی جموں و کشمیر اٹی انسانی حق انا خلاف ورزی تے تالان کرسا ترجمان پارے کہ بھارتی فورس آک مبینہ وڑاٹ 214 کشمیری تے قتل کریر، اوفتیان 57 حراست اٹی ءُ یا فرضی مقابلہ غاتیٹی شہید کننگار۔بیرہ تدوک آ ہفتہ جموں نا سدھرا خلق اٹی اسہ فرضی مقابلہ اسے ٹی 4 بندغ ءِ شہید کننگا، ہندن ءُ حوال آک ءُ کہ لاش آتے بیدس درستی راستی آن ہُشنگانے، نن انسانی حق انا جہانی مشینری و تنظیم تیان خواست کینہ کہ او داسانحہ نا نوٹس ءِ ہلیر۔ تازہ انگا حساب وکتاب نا رداٹ 4000 آن زیات کشمیری مقبوضہ وادی و بھارت نا چندی زندان تیٹی بند ءُ۔ اوپارے کہ مقبوضہ جموں وکشمیر اٹی سیاسی بندوی و انسانی حق انا سرگرم کارندہ غاتے شست کننگ انگ ءِ و اوفتے قید اٹ تخنگ انگ ءِ، مزاحمتی راہشون ہرافتے ٹی کل جماعتی حریت کانفرنس نا چیئرمین مسرت عالم بھٹ، محمد یاسین ملک، شبیر احمد شاہ، نعیم احمد خان، آسیہ اندرابی، و انسانی حق انا پنی آ راہشون خرم پرویز جعلی مقدمہ غاتیٹی پدریسہ نظر بند ئسر، 2002 ٹی کشمیری تے مذہبی آجوئی و اجتماع نا حق انا کاریم اٹ اتنگ آن ہم توننگاسس انتئے کہ بھارتی کمامدارآک مقبوضہ جموں و کشمیر اٹی مذہبی اجتماع و نماز جمعہ غا وار وار پابندی خلک، داحق آتے یات تخنگ خاص وڑاٹ اہم ءِ اینو ہراتم نن جموں وکشمیر نا مخلوق نا حق خودارادیت نا دے ءِ اڈتننگ اُن۔ اوافسوز ظاہر کرے کہ مقبوضہ جموں وکشمیر نا مظلوم مخلوق داحق ءِ کاریم اٹ اتنگ کتور، دادے جہانی برادری خاص وڑاٹ اقوام متحدہ ءِ جموں وکشمیر نا الس تون 74 سال مست کروک آ تینا قول ءِ پورو کننگ و اوفتا حق خودارادیت نا جہد نا مخ تفی ءِ کننگ نا گرج انا یات ترفک۔ اوپارے کہ پاکسستان اقوام متحدہ نا سلامتی کونسل نا تعلقدار قرارداد آتا رداٹ حق خودارادیت نا دوئی کننگ کن جموں وکشمیر نا الس نا بے پرخ اخلاقی ، سیاسی و سفارتی مخ تفی ءِ برجاتخک۔