جہانی برادری مقبوضہ جموں وکشمیر اٹی بھارتی ریاستی دہشت گردی نا توننگ کن دمدستی گام گیج کے، سلاہکاروزیراعظم قمرزمان کائرہ نا کشمیر حق خودارادیت دے انا وخت آ کلہو

اسلام آباد۔ 05 جنوری (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ بھارتی گام گیج جہانی کانود و چارمیکو جنیوا کنونشن نا پاش آن پاش خلاف ورزی ءِ، اقوام متحدہ و جہانی برادری مقبوضہ جموں وکشمیر اٹی بھارتی ریاستی دہشت گردی نا توننگ دمدستی گام گیج کیر۔ پنچ شنبےنادے آ کشمیر حق خودارادیت دے انا وخت آ کلہو اٹی اوپارے کہ اقوام متحدہ حق خودارادیت کن پاس کروک آ قرارداد آتیا عملدرآمد ءِ پک کے، کشمیری تا بابت حق خودارادیت نا قرارداد آتے پاس مروک 74 سال نا وخت گدرینگانے، اوفتے بھارت نا ناروا کوزہ غان آجو کرفنگے۔ قمر زمان کائرہ پارے کہ حق خودارادیت نا خاطر ہزار آ کشمیری تینا جون تے ندر کرینو، بھارت اقوام متحدہ نا قرارداد و انسانی حق آتے لتاڑنگ ءِ ، او مقبوضہ جموں و کشمیر اٹی اسرائیلی وڑانا پالیسی تیا ہِننگ ءِ۔ اوپارے کہ بھارت 05 اگست 2019 نا غیرکانودی و اسہ کنڈی گام گیج آتا آڑاٹ مقبوضہ جموں وکشمیر نا ڈیموگرافی ءِ بدل کننگ ءِ، بھارتی گام گیج جہانی کانود و چارمیکو جنیوا کنونشن نا پاش آن پاش خلاف ورزی ءِ ، اقوام متحدہ و جہانی برادری مقبوضہ کشمیر اٹی بھارتی ریاستی دہشت گردی نا توننگ کن دمدستی گام گیج کیر۔ قمر زمان کائرہ پارے کہ وزیراعظم محمد شہباز شریف و وزیرخارجہ بلاول بھٹو زرداری دنیا نا غٹ فورم تیا کشمیری تا حق انا جنگ تون جیرت اٹ مون تننگ اٹی ءُ، کشمیر نا ویل آ سوگو موقف نا سوب آن بھارت اٹی بلاول بھٹو زرداری نا برخلاف برانز کننگا۔ اوکشمیری تا حق انا جنگ ءِ دنیا نا غٹ فورم تیا برجاتخنگ نا عزم انا درشانی ءِ کرے۔