اسلام آباد۔ 05 جنوری (اے پی پی) کنٹرول لائن نا ہڑتوم آ کنڈ و مچ آ دنیا ٹی رہینگوک آ کشمیریک اینو یوم حق خودارادیت اڈتننگ اٹی ءُ ہرانا مسخت جہانی برادری خاص وڑاٹ اقوام متحدہ غا زور شاغنگ ءِ کہ او کشمیری تتون کروک آ تینا قول آتے پورو کے۔ کشمیر میڈیا سروس نا رداٹ “یوم حق خودارادیت” کل جماعتی حریت کانفرنس نا کال آ اڈتننگ انگ ءِ۔ دا 5 جنوری 1949 نا دے ئسک ہراتم اقوام متحدہ نا سلامتی کونسل اسہ تاریخی قرارداد اس منظور کریسس ہراٹی پاننگاسس کہ ریاست جموں و کشمیر نا بھارت یا پاکستان تون الحاق نا سوج انا فیصلہ آجو و بے کنڈ ہلوک استصواب رائے نا جمہوری وڑاٹ کننگک۔ اینو آزاد کشمیر ، پاکستان و مچ آ دنیا ٹی برانزی مچی، ریلی، سیمینار و کانفرنس آتون اوار چندی پروگرام اڈتننگک تانکہ اقوام متحدہ غا زور شاغنگ مرے کہ او کشمیر ی تے بھارتی ریاستی دہشت گردی آن بچنگ کن کشمیر ناجھیڑہ ءِ تینا تعلقدار قرارداد آتیا عملدرآمد کرفسا ایسر کرفے۔ ایسر نا چاری کشمیر نا ویل سویلی ایشیا نا امن کن بھلو خطرہ اسے۔ اقوام متحدہ نا 05 جنوری 1949 نا قرارداد دا جھیڑہ نا ایسری نا بنداو فراوان کیک ولے بھارت نا ضد آ تالان روایہ تدوک آ ہفت دہائی آن دا جھیڑہ نا ایسری نا کسر اٹ اسہ بھلو اڑاند اس جوڑ ءِ۔ بدبختی اٹ جہانی ادارہ کشمیر نابارواٹی تینا قرارداد آتیا عملدرآمد کرفنگ اٹ بے سہب مسنے و دا ہندا نا نتیجہ ءِ کہ بھارت نا غیرکانودی کوزہ ٹی جموں وکشمیر نا الس پدریسہ مصیبت و مشکل آتا گواچی ءُ۔
