لاہور۔ 05 جنوری (اے پی پی) وزیراعلیٰ پنجاب چودھری پرویز الٰہی پارینے کہ کشمیری الس نا حق خودارادیت آ 5 جنوری 1949 آ اقوام متحدہ نا کمیشن ہندوستان و پاکستان اسہ قرارداد اس منظور کرے ہرا جموں وکشمیر اٹی آجو و انصاف اٹ استصواب رائے نا ضمانت ایتک۔ پنچ شنبےنادے آ جاری بیان اٹی اوپارے کہ 5 جنوری نا دے کشمیری تا حق خودارادیت نا بابت اڈتننگ نا مسخت جہانی برادری ءِ کشمیری تا حق خودارادیت ترفنگ نا قول انا کنڈا کرفنگ ءِ۔ اوپارے کہ 74 سال آن کشمیری دا قول انا وفا مننگ نا انتظار اٹی ءُ، اقوام متحدہ تینا دا عزم انا شرف ءِ کے۔ اونا پاننگ ئس کہ حق خودارادیت انسانی وقار نا اسہ اہم ءُ جزو اسے، حق خودارادیت نا قرارداد آن انحراف انسانی آجوئی، انسانی حق انا جہانی اعلامیہ و اقوام متحدہ نا انسانی حق انا معاہدہ غاتا نفی ءِ۔ وزیراعلیٰ پارے کہ بھارت دا ناقابل تنسیخ انسانی حق انا پدریسہ خلاف ورزی ءِ کننگ اٹی ءِ، او مقبوضہ جموں وکشمیر نا آبادیاتی پنجر ءِ بدل کرسا کشمیری تا تشخص ءِ مجروح کننگ نا ناپاک کوشست کننگ اٹی ءِ۔ اوپارے کہ پدریسہ غیرکانودی و اسہ کنڈی گام گیج آتا کمک اٹ بھارتی حکومت مقبوضہ جموں و کشمیر اٹی خوف و ہڑدڑ نا چاگڑد اس ودی کرینے، جہانی برادری، اقوام متحدہ و انسانی حق انا جہانی تنظیمک بھارت نا گام گیج آتا برخلاف بایدے ایکشن ہلیر۔
