اسلام آباد۔ 05 جنوری (اے پی پی) وزیراعظم آزاد کشمیر سردار تنویر الیاس خان پارینے کہ 75 سال مست اقوام متحدہ کشمیری تے حق خودارادیت ترفنگ نا ہرا قول ءِ کریس اوڑا عملدرآمد کرفنگ متو، جہانی ادارہ جموں وکشمیر نا الس ءِ بے کنڈ ہلوک استصواب رائے نا کمک اٹ حق خودارادیت نا ضمانت تسوسس۔ یوم حق خودارادیت نا وخت آ تینا کلہو اٹی وزیراعظم اے کے پارے کہ ظالمانہ بھارتی کوزہ نا جور ءِ سہینگ آن پد ہم اہل کشمیر حق خودارادیت نا دوئی کننگ نا خواست آ ڈٹ کر سلوک ءُ، اہل پاکستان و کشمیری قوم غیر انسانی و غیرکانودی کوزہ نا جور آن آجوئی نا جہد اٹی اہل کشمیر تون تفوک ءُ۔ اوپارے کہ کوزہ گیر بھارتی فوج انا دوتے اٹ زالبول و چناتتون اوار ہزار آ کودک کشمیری تے شہید کننگا ولے کشمیریک آجوئی آن کم اسہ گڑاسے آ ہم سمجھوتہ کننگ کن تیار افس، بھارتی حکومت پدریسہ غیرکانودی و اسہ کنڈی گام گیج آتا کمک اٹ مقبوضہ جموں وکشمیر اٹی خوف و بے چیٹی نا فضا ودی کرینے ، ہموڑے آجوئی نا تحریک ءِ لتاڑنگ کن مودی سرکار غٹ سیاسی سرکڑدہ غاتے قیدوبند کرینے۔ وزیراعظم آزاد کشمیر پارے کہ اقوام متحدہ و جہانی ادارہ غاک کشمیری سرکڑدہ غاتے بھارتی جور آن آجو ومیڈیا و انسانی حق انا تنظیم تے مقبوضہ جموں وکشمیر اٹی آجو کاریم کننگ نا وارخواہی فراوان کرفر۔ اوپارے کہ جموں وکشمیر نا آجوئی کن جان تے ندر کروک آ غٹ شہیدآتے خراج عقیدت پیش کینہ، اقوام متحدہ و انسانی حق انا تنظیمک ہموڑے انسانی حق انا بھلا لتاڑتا بارواٹ جاست وپاست کیر۔ وزیراعظم پارے کہ حق خودارادیت انسانی حق انا بنداوی جزو ءِ ، جہانی برادری جموں وکشمیر آن بھارتی غیرکانودی کوزہ ءِ یلہ کرفنگ کن کڑد ادا کیر، 5 اگست 2019 آ بھارت نا کنڈآن کشمیر آ غیرآئینی کوزہ کننگ ءِ غٹ کشمیریک مسترد کرینو۔
